ABŞ Senatının Silahlı Qüvvələr Komitəsi Amerikanın müdafiə siyasətinin əsas prioritetlərini müəyyən edən və silah alışlarının həcmini tənzimləyən Milli Müdafiə Qanununun (NDAA) öz versiyası üzərində işi başa çatdırıb.
Bizimyol.info xəbər verir ki, qanunvericilər Ukraynaya yardım proqramının müddətinin uzadılmasına səs verərək, Ukraynanın Təhlükəsizlik Yardımı Təşəbbüsü üçün ayrılmış maliyyəni 750 milyon dollara qədər artırıblar.
Bu addım Donald Tramp administrasiyasının yardım həcmlərini azaltmağa yönəlmiş siyasi kursuna baxmayaraq, Konqresin Kiyevə dəstəyi davam etdirmək niyyətini nümayiş etdirir.
Ümumi büdcəsi 1,15 trilyon dollar təşkil edən sənəddə bir sıra diqqətçəkən təşəbbüslər də yer alıb. Bunlardan biri Müdafiə Nazirliyinin adının “Müharibə Nazirliyi” olaraq dəyişdirilməsi təklifidir. Respublikaçıların dəstəklədiyi bu ideya Nümayəndələr Palatasının komitə versiyasında da əksini tapıb.
Bundan əlavə, Senatın hazırladığı mətndə Milli Müdafiə Qanunu çərçivəsində ayrılan vəsaitlərin Ukraynanın beynəlxalq səviyyədə tanınmış əraziləri üzərində Rusiyanın suverenliyini tanıya biləcək hər hansı fəaliyyət üçün istifadəsinə birbaşa qadağa nəzərdə tutulur.
Sənədə əsasən, ABŞ Müdafiə Nazirliyi həmin ərazilərin müdafiəsi və ya geri qaytarılması əməliyyatları üçün Kiyevə kəşfiyyat dəstəyi də göstərməlidir.
Qanun layihəsi hərbçilərin maaşlarının artırılmasından tutmuş, iri həcmdə sursat və hərbi texnika alışlarının planlaşdırılmasına qədər müdafiə sahəsinin geniş spektrini əhatə edir.
Xüsusilə, "F-15EX" və "F-35" qırıcıları da daxil olmaqla müxtəlif silah sistemlərinin və digər strateji əhəmiyyətli hərbi məhsulların uzunmüddətli satınalınması üçün səlahiyyətlərin verilməsi nəzərdə tutulur.
Komitədəki respublikaçı çoxluq bu tədbirləri dəstəkləsə də, sənədin yekun qəbuluna qədər qanunvericiləri hələ mürəkkəb proses gözləyir.
İndi komitələr tərəfindən təsdiqlənmiş qanun layihələri həm Nümayəndələr Palatasında, həm də Senatda tam tərkibdə səsverməyə çıxarılmalıdır. Bundan sonra hər iki palatanın üzvləri prezidentin imzasına göndərilməzdən əvvəl vahid kompromis variantı razılaşdırmalıdırlar.
Prosesin asan olmayacağı gözlənilir. Belə ki, münaqişənin əvvəlində Ukraynaya ikipartiyalı dəstək göstərilsə də, Donald Trampın 2025-ci ilin yanvarında Ağ Evə qayıdışından sonra bəzi respublikaçılar Kiyevə yardımın miqyası ilə bağlı daha ehtiyatlı mövqe tutmağa başlayıblar.
Bununla belə, təklif olunan tədbirlər paketi davam edən döyüşlər və sülh danışıqlarında irəliləyişin olmaması fonunda amerikalı qanunvericilərin proseslərə təsir imkanlarını qoruyub saxlamaq niyyətini nümayiş etdirir.
Bizimyol.info
