2026-cı il iyunun 12-də — Rusiyada qeyd olunan Rusiya Günündə Ukrayna Silahlı Qüvvələri Rusiyanın hərbi və sənaye obyektlərinə qarşı genişmiqyaslı zərbələr həyata keçirib.
Bizimyol.info xəbər verir ki, Ukrayna Baş Qərargahının yaydığı məlumata görə, hücumların əsas hədəfləri neft emalı zavodları, logistika mərkəzləri və hərbi təyinatlı sənaye müəssisələri olub.
Ən ciddi zərbələrdən biri Tatarıstan Respublikasının Nijnekamsk şəhərində yerləşən “TANEKO” və “TAIF-NK” neft emalı zavodlarına endirilib. Hücumdan sonra hər iki müəssisənin ərazisində yanğın baş verdiyi bildirilib. “TANEKO” Rusiyanın ən iri neft emalı müəssisələrindən biri hesab olunur və burada dizel, aviasiya yanacağı və müxtəlif neft məhsulları istehsal edilir. “TAIF-NK” kompleksi isə yüksək emal gücü ilə seçilir və həm mülki, həm də hərbi sahələr üçün strateji məhsullar hazırlayır.
Zərbələr yalnız Tatarıstanla məhdudlaşmayıb. Samara vilayətində yerləşən “Tolyattikauçuk” kombinatının da vurulduğu açıqlanıb. Müəssisə sintetik kauçuk istehsal edir və bu materiallar raket yanacağı, kimya sənayesi məhsulları və yüksək oktanlı əlavələrin hazırlanmasında istifadə olunur. Baş Qərargahın məlumatına əsasən, Kuybışev Neft Emalı Zavodu da fəaliyyətini dayandırmağa məcbur olub. Zavodun əsas emal qurğularının zədələndiyi təsdiqlənib.
Ukrayna tərəfi yalnız Rusiya ərazisində deyil, işğal altında olan bölgələrdə də hərbi hədəflərə zərbələr endirib. Zaporojye vilayətindəki “Vostoçnıy” poliqonunda düşmənin canlı qüvvəsinin toplandığı ərazi vurulub. Həmçinin Luqansk vilayətində artilleriya sursat anbarı, Mariupolda isə logistika bazası məhv edilib.
Müşahidəçilər qeyd edirlər ki, bu hücumların məhz Rusiya Günündə həyata keçirilməsi simvolik mesaj daşıyır. Ukrayna bununla həm Rusiyanın enerji sektoruna zərbə vurmağa, həm də arxa cəbhədə təhlükəsizlik hissini sarsıtmağa çalışır.
Son aylarda Ukrayna uzaqmənzilli dron və raket imkanlarını artıraraq Rusiyanın dərinliklərində yerləşən obyektləri daha tez-tez hədəfə alır. Ekspertlərin fikrincə, enerji infrastrukturu və hərbi sənaye müəssisələrinə qarşı bu cür hücumlar Rusiyanın hərbi-logistik imkanlarına uzunmüddətli təsir göstərə bilər.
Bizimyol.info
