2026-cı il futbol üzrə dünya çempionatının İspaniya–Argentina finalı başlamazdan əvvəl ABŞ-ın Nyu-Cersi ştatındakı MetLife Stadium ətrafında görünməmiş təhlükəsizlik tədbirləri tətbiq edilib.

Bizimyol.info xəbər verir ki, ABŞ Prezidenti Donald Trampın oyunu stadiondan izləyəcəyi üçün qarşılaşma "Milli Xüsusi Təhlükəsizlik Tədbiri" statusu alıb.

ABŞ Məxfi Xidmətinin əməkdaşları stadiona daxil olan bütün azarkeşləri fərdi qaydada yoxlayır. Hər bir tamaşaçının üzərində və çantalarında axtarış aparılması səbəbindən 82 500 nəfərlik stadionun bütün tamaşaçılarının oyunun startına qədər tribunaya daxil ola bilməyəcəyi ilə bağlı narahatlıqlar yaranıb.

Matçı işıqlandırmaq üçün gələn jurnalistlər və təşkilat komitəsinin əməkdaşları da uzun növbələrlə üzləşiblər. Stadionun girişində çəkilən görüntülər göstərir ki, oyunun başlamasına altı saat qalmış belə giriş nöqtələrində sıxlıq yaranıb və növbələr stadionun ətrafındakı dayanacaq ərazisinə qədər uzanıb.

Təşkilatçılar təhlükəsizlik prosedurlarının vaxt aparmasına baxmayaraq, bütün tədbirlərin tamaşaçıların təhlükəsizliyini təmin etmək məqsədi daşıdığını bildirirlər.

İspaniya və Argentina turnirin ən güclü komandaları kimi finala yüksəlib. Futbol ictimaiyyətində qarşılaşma son illərin ən yüksək səviyyəli dünya çempionatı finalı kimi qiymətləndirilir.

Mütəxəssislər İspaniyanın topa nəzarətə əsaslanan kollektiv oyununu Argentina millisinin döyüşkən xarakteri və Lionel Messinin həlledici məqamlarda oyunun taleyini dəyişmək bacarığı ilə müqayisə edirlər. Bir çox analitiklər finalın çox gərgin keçəcəyini və qalibin yalnız xırda detallar hesabına müəyyənləşəcəyini proqnozlaşdırırlar.

2026-cı il dünya çempionatının finalı bu gün ABŞ vaxtı ilə saat 15:00-da (Bakı vaxtı ilə 23:00) başlayacaq. Dünyanın diqqəti isə Nyu-Cersidə keçiriləcək bu həlledici qarşılaşmaya yönəlib.

Bizimyol.info