Ukrayna son aylarda Rusiya ərazisinə və işğal olunmuş bölgələrə qarşı dron və raketlərdən istifadə edərək intensiv hücumları artırıb. Bu zərbələr Rusiya hərbi və iqtisadi sisteminə ciddi təsir göstərir.

Bizimyol.info xəbər verir ki, "Bild"in yazdığına görə, Ukrayna Silahlı Qüvvələrinin həyata keçirdiyi genişmiqyaslı hücumlar Rusiya prezidenti Vladimir Putin üçün eyni anda dörd əsas problemi ortaya çıxarıb.

Birinci problem cəbhədə yaranmış dalana dirənmək vəziyyətidir. 2023-cü ildən bəri cəbhə xəttində ciddi strateji dəyişiklik müşahidə olunmur. Döyüşlər daha çox dronlar və raketlər üzərindən aparılır, tərəflər isə bir-birinin təchizat xətlərinə, yanacaq və sursat daşıyan logistik marşrutlara zərbələr endirir. Nəticədə kilometrlərlə uzanan “boş zona” formalaşıb və bu ərazilər dronların nəzarətindədir.

İkinci problem Rusiya hərbi logistikasının pozulmasıdır. Ukrayna neft emalı zavodlarını, yanacaq anbarlarını və dəmir yolu infrastrukturunu hədəfə alır. Bu isə həm Rusiya iqtisadiyyatına, həm də ordunun təchizatına ciddi zərər vurur.

Üçüncü problem Krımın müdafiəsi ilə bağlı yaranan çətinliklərdir. Ekspertlərin fikrincə, Krımın təhlükəsizliyi Rusiyanın Qara dənizdəki strateji mövqeyi üçün həyati əhəmiyyət daşıyır və yarımadanın izolyasiyası Moskva üçün həm siyasi, həm də hərbi risk yaradır.

Dördüncü problem isə müharibənin Rusiya cəmiyyətində daha görünən hala gəlməsidir. Ukrayna zərbələri nəticəsində müharibə artıq bir çox Rusiya vətəndaşı üçün gündəlik reallığa çevrilib və iqtisadi təsirləri daha açıq hiss olunur.

Müharibənin Tədqiqi İnstitutu (MTİ) bildirir ki, Ukrayna 2026-cı ilin may və iyun aylarında yüzlərlə orta və uzaq mənzilli zərbə həyata keçirib, Rusiya neft infrastrukturuna isə onlarla hücum edilib. Bu dinamika müharibənin gedişində dron və uzaq məsafəli hücumların rolunun getdikcə artdığını göstərir.

Qadir, Bizimyol.info