İspaniyanın meşə yanğınlarından ən çox zərər görən bölgələrindən biri olan Qalisiyada yerli qoyun, keçi və Kaçena cinsli inəklər yenidən otlaqlara qaytarılır. Məqsəd alovun sürətlə yayılmasına səbəb olan quru kolluq və bitkiləri təbii yolla məhv edərək yanğın riskini azaltmaqdır.

Bizimyol.info xəbər verir ki, "Reuters"in məlumatına görə, "keçi-inək" kimi tanınan Kaçena cinsli heyvanlar dağlıq ərazilərdə rahat hərəkət edir və demək olar ki, bütün bitkilərlə qidalanır. Məhz bu xüsusiyyətləri sayəsində onlar yanğına səbəb ola biləcək bitki örtüyünü təmizləyirlər.

2017-ci ildə Vinçios bölgəsində baş verən dağıdıcı yanğından sonra yerli icmalar əsrlərdir tətbiq olunan bu üsulu yenidən bərpa ediblər. Nəticədə, Qalisiyada yerli mal-qaranın sayı 1990-cı illərin sonundakı 1800 başdan 2026-cı ilin əvvəlinə 30 min başdan çox artırılıb.

Mütəxəssislər bildirirlər ki, otlayan heyvanlar alovun yerdən ağacların çətirlərinə keçməsinin qarşısını almaqda effektiv rol oynayır. Bununla belə, onlar vurğulayırlar ki, bu üsul meşələrin mexaniki təmizlənməsi və nəzarətli yandırma kimi digər tədbirlərlə birlikdə tətbiq edildikdə daha səmərəli nəticə verir.

Qeyd edək ki, Qalisiya ötən il İspaniyada meşə yanğınlarından ən çox zərər çəkən bölgələrdən biri olub. Burada təxminən 119 min hektar ərazi yanaraq məhv olub. Alimlər isə Cənubi Avropada meşə yanğınlarının intensivləşməsini iqlim dəyişikliyi ilə əlaqələndirirlər.

Bizimyol.info