İran hakimiyyəti ABŞ-la münaqişənin nizamlanması ilə bağlı danışıqları bərpa etməyə çalışmadığını bildirib və ABŞ Prezidenti Donald Trampın açıqlamalarının əsas məqsədinin neft qiymətlərini aşağı salmaq olduğunu iddia edib.

Bizimyol.info xəbər verir ki, İran parlamentinin Milli Təhlükəsizlik Komitəsinin üzvü Həsən Qəşqəvi bildirib ki, Trampın İranın danışıqlar tələb etdiyi barədə açıqlamaları həqiqəti əks etdirmir.

“Trampın İranın danışıqlar üçün müraciət etdiyi barədə iddiası heç bir şəkildə reallığa uyğun deyil. Onun təkrarlanan yalanları artıq bazarları qısa müddətə belə sakitləşdirə bilmir”, – deyə Qəşqəvi "X" sosial şəbəkəsində yazıb.

İranlı deputat ABŞ liderini düşdüyü “çıxılmaz vəziyyətdən qurtulmaq üçün daha təsirli yollar axtarmağa” çağırıb.

Qeyd edək ki, iyulun 21-də Donald Tramp İranın ABŞ-la yeni görüş keçirmək istədiyini, lakin Vaşinqtonun Tehran “əhəmiyyətli addımlar atmağa hazır olana qədər” danışıqların bərpasında maraqlı olmadığını bildirib.

Bizimyol.info