Böyük Britaniyanın Baş naziri Kir Starmer hakim Leyboristlər Partiyasının deputatlarının dəstəyini itirdiyi üçün istefasına dörd gün qalmış Kiyevə səfər edib.

Bizimyol.info xəbər verir ki, bu barədə Dauninq-strit 10-un mətbuat xidməti məlumat yayıb.

Səfər çərçivəsində Starmerin Ukrayna Prezidenti Vladimir Zelenski ilə görüşü nəzərdə tutulur. Baş nazirin ofisinin bəyanatında bildirilir ki, Starmerin rəhbərliyi dövründə Böyük Britaniya münaqişə başa çatdıqdan sonra Ukraynaya təhlükəsizlik təminatları verməyə hazır olan 34 ölkədən ibarət “istəklilər koalisiyası” yaradıb, həmçinin Ukrayna ilə 100 illik tərəfdaşlıq sazişi imzalayıb.

Qeyd olunub ki, 2024-cü ilin iyul ayından etibarən London Kiyevə 250 mindən çox pilotsuz uçuş aparatı, təxminən 8 min raket və 350 mindən artıq artilleriya mərmisi göndərib. Starmerin dövründə Böyük Britaniya Almaniya ilə birlikdə ABŞ-dan Ukrayna üzrə Təmas Qrupuna (“Ramştayn” formatı) həmsədrlik funksiyasını təhvil alıb və Kiyevlə pilotsuz uçuş aparatlarının istehsalı sahəsində əməkdaşlığı genişləndirib. Həmin müddətdə Birləşmiş Krallıq Rusiyaya qarşı 1 400-dən çox fiziki və hüquqi şəxsə, eləcə də gəmiyə sanksiyalar tətbiq edib.

Kir Starmer iyunun 22-də Leyboristlər Partiyasının lideri və Böyük Britaniyanın baş naziri vəzifələrindən ayrılmaq niyyətini açıqlayıb. Partiyadaxili seçki prosesi iyulun 9-da başlayıb. Digər namizədlərin olmaması səbəbindən yeganə namizəd olan Böyük Mançesterin sabiq meri və İcmalar Palatasının deputatı Endi Börnəmin iyulun 17-də Leyboristlər Partiyasının yeni lideri elan ediləcəyi, iyulun 20-də isə Kral III Çarlzın qəbulundan sonra baş nazir vəzifəsinə başlayacağı gözlənilir.

Böyük Britaniyada siyasi böhran mayın 7-də keçirilən yerli özünüidarəetmə orqanlarına seçkilərdən sonra dərinləşib. Seçkilərin nəticələrinə əsasən, Leyboristlər Partiyası ilk dəfə Uels parlamenti üzərində nəzarəti itirib.

Bizimyol.info