Rusiyanın federal büdcəsində 2026-cı il üzrə xərclər təsdiqlənmiş plandan 1 trilyon rubldan (təqribən 13 milyard dollar) çox arta bilər.

Bizimyol.info xəbər verir ki, bu barədə "Reuters" Rusiya hökumətinin büdcə portalının məlumatlarına istinadən xəbər yayıb.

Məlumata görə, federal büdcə xərcləri hazırkı qanunla nəzərdə tutulan 44,07 trilyon rubldan 45,11 trilyon rubla qədər yüksələ bilər. Eyni zamanda gəlirlər üzrə proqnoz dəyişməz qalır və 40,28 trilyon rubl təşkil edir.

Nəticədə büdcə kəsirinin 4,83 trilyon rubla çatacağı gözlənilir. Hazırkı rəsmi proqnozda isə bu göstərici 3,79 trilyon rubl səviyyəsində nəzərdə tutulmuşdu. Beləliklə, kəsirin təxminən 1 trilyon rubl artacağı ehtimal olunur.

Rəsmi sənədlərdə xərclərin artmasının səbəbləri açıqlanmayıb. "Reuters" əlavə vəsaitlərin Ukraynaya qarşı davam edən müharibənin maliyyələşdirilməsi ilə bağlı ola biləcəyini ehtimal edib.

Rusiya Maliyyə Nazirliyinin məlumatına əsasən, 2026-cı ilin ilk yarısında federal büdcənin kəsiri artıq 5,73 trilyon rubla, yaxud ÜDM-in 2,5 faizinə çatıb. Bu göstərici ötən ilin eyni dövrü ilə müqayisədə 1,7 dəfə çoxdur.

Rusiyanın maliyyə naziri Anton Siluanov daha əvvəl bildirib ki, yekun büdcə kəsiri ilkin proqnozdan yüksək olacaq. Lakin onun sözlərinə görə, bu, daxili borclanmanın həcminin əhəmiyyətli dərəcədə artırılmasını tələb etməyəcək.

Bundan əlavə, Rusiya Maliyyə Nazirliyi büdcədə ilkin kəsirin sıfıra endirilməsi hədəfinə çatma müddətini 2029-cu ilə qədər təxirə salıb. Nazirlik bununla büdcə kəsirinin qarşıdakı bir neçə il ərzində əvvəl nəzərdə tutulandan yüksək olaraq qalacağını etiraf edib.

Bizimyol.info