Tatuajların (döymə) əsrlər boyu mövcud olmasına baxmayaraq, alimlər onların insanın immun sisteminə necə təsir göstərdiyini yalnız son illərdə daha dərindən araşdırmağa başlayıblar.
Bizimyol.info xəbər verir ki, Lund Universitetinin alimlərinin araşdırmalarına görə, tatuaj vurulduqdan sonra mürəkkəb hissəcikləri yalnız dəridə qalmır. Onların bir hissəsi limfa sisteminə keçərək orqanizmin müdafiəsində mühüm rol oynayan limfa düyünlərində toplana bilər.
Mütəxəssislərin sözlərinə görə, tatuaj vurularkən immun sistemi piqmenti yad maddə kimi qəbul edir və onu orqanizmdən uzaqlaşdırmağa çalışır. Lakin mürəkkəb hissəcikləri immun hüceyrələrinin onları tamamilə aradan qaldırması üçün həddindən artıq böyük olduğundan, ömür boyu toxumalarda qalaraq davamlı immun reaksiyasını stimullaşdırır.
Xüsusi narahatlıq doğuran məqamlardan biri müasir tatuaj mürəkkəblərinin tərkibidir. Tədqiqatlar bəzi mürəkkəblərdə nikel, kobalt, xrom və digər ağır metalların izlərini, eləcə də müəyyən şəraitdə potensial təhlükəli maddələrə parçalana bilən kimyəvi birləşmələri aşkar edib. Allergik reaksiyalar və xroniki iltihab halları xüsusilə qırmızı, sarı və narıncı piqmentlərlə daha çox əlaqələndirilir.
Hazırda tatuajların onkoloji xəstəliklərin yaranma riskini artırdığını təsdiqləyən kifayət qədər elmi sübut yoxdur. Bununla belə, laboratoriya tədqiqatları və ayrı-ayrı müşahidələr bu mövzunun daha geniş araşdırılmasına ehtiyac olduğunu göstərir. Mütəxəssislər həmçinin xatırladırlar ki, sanitar-gigiyenik qaydalara əməl olunmadıqda tatuaj proseduru infeksiya riski daşıyır.
Ekspertlər tatuaj salonuna müraciət etməzdən əvvəl ustanın sertifikatlaşdırılmış mürəkkəbdən istifadə etdiyinə və bütün sterilizasiya qaydalarına əməl etdiyinə əmin olmağı tövsiyə edirlər. Autoimmun xəstəlikləri olan və ya immun sistemi zəifləmiş şəxslərə isə əvvəlcədən həkimlə məsləhətləşmək məsləhət görülür.
Tədqiqatçılar vurğulayırlar ki, tatuajlar özünüifadənin populyar vasitələrindən biri olaraq qalır. Bununla belə, onların sağlamlığa uzunmüddətli təsirlərinin tam müəyyənləşdirilməsi üçün əlavə elmi araşdırmalara ehtiyac var.
Bizimyol.info
