Fransa Səhiyyə Nazirliyi ölkədə ilk dəfə Ebola virusuna yoluxma halının təsdiqləndiyini açıqlayıb.

Bizimyol.info xəbər verir ki, nazirliyin məlumatına görə, xəstə dərhal izolyasiyaya alınıb və onunla təmasda olan şəxslərin müəyyən edilməsi üçün izləmə prosesi başlanıb.

Yoluxan şəxs Konqo Demokratik Respublikasında humanitar missiyada iştirak etdikdən sonra Fransaya qayıdan həkimdir. Bu, ölkədə davam edən epidemiya fonunda qeydə alınan ilk Ebola yoluxması kimi tarixə düşüb.

Səhiyyə Nazirliyinin açıqlamasında bildirilib ki, “ölkə ərazisində ilk Ebola virusu halı bu gün təsdiqlənib”. Hökumətin vəziyyəti diqqətlə izlədiyi, o cümlədən Baş nazir Sebastien Lekornu-nun prosesdən xəbərdar olduğu qeyd olunub.

Rəsmilər yoluxan şəxsin təcrid olunduğunu və epidemioloji nəzarət tədbirlərinin gücləndirildiyini vurğulayıblar. Eyni zamanda Avropada ümumi yoluxma riski aşağı səviyyədə qiymətləndirilir.

Qeyd edək ki, Konqo Demokratik Respublikasının İturi bölgəsində may ayında yüzlərlə şübhəli yoluxma və onlarla ölüm qeydə alındıqdan sonra Ebola epidemiyası elan olunmuşdu. Dünya Səhiyyə Təşkilatı da daha sonra vəziyyəti beynəlxalq ictimai sağlamlıq fövqəladə halı kimi qiymətləndirib.

Mütəxəssislərin məlumatına görə, hazırkı epidemiya nadir “Bundibugyo” Ebola ştammı ilə bağlıdır və bu variant üçün təsdiqlənmiş spesifik peyvənd və ya müalicə hələ mövcud deyil.

Bununla belə, səhiyyə qurumları bildirirlər ki, yoluxmanın erkən mərhələdə aşkarlanması və sərt izolyasiya tədbirləri virusun yayılma riskini azaltmaq üçün əsas rol oynayır.

Bizimyol.info