Avropa İttifaqı (Aİ) Ermənistana qarşı Rusiyanın tətbiq etdiyi idxal məhdudiyyətlərindən sonra ölkəyə təcili ticarət dəstəyi mexanizmləri hazırlayır.

Bizimyol.info xəbər verir ki, bu barədə "Financial Times" məlumat yayıb.

Bildirilir ki, Avropa Komissiyası Rusiya təzyiqlərini kompensasiya etmək və Cənubi Qafqaz regionunda təsirini gücləndirmək məqsədilə yeni ticarət tədbirləri üzərində işləyir.

Hazırlanan plan çərçivəsində Ermənistanın qida məhsulları və kənd təsərrüfatı ixracı üçün gömrük rüsumlarının azaldılması nəzərdə tutulur. Təxminən 20 məhsul kateqoriyasını əhatə edən bu təşəbbüsün illik dəyərinin 420 milyon avro civarında olduğu bildirilir. Bu addım Rusiyanın Ermənistana qarşı tətbiq etdiyi məhdudiyyətlərə cavab kimi qiymətləndirilir.

Qeyd olunur ki, tədbirlər yaxın həftələrdə təqdim edilə bilər və Avropa İttifaqı üzv ölkələrinin və Avropa Parlamentinin təsdiqini tələb edəcək. Brüssel Moskvanın iqtisadi təzyiqlərini artırmasından narahatlığını ifadə edir.

Avropa Komissiyası-dan bildirilib ki, təşəbbüsün məqsədi Ermənistan istehsalçılarının Aİ bazarına çıxışını genişləndirmək və məhdudiyyətlərdən ən çox zərər görən sektorları dəstəkləməkdir.

Məsələ artıq Avropa İttifaqı xarici işlər nazirlərinin və Ermənistan xarici işlər nazirinin Lüksemburqda keçirdiyi görüşdə müzakirə olunub. Bundan əlavə, Aİ-nin genişlənmə üzrə komissarı Marta Kosun yaxın zamanda İrəvana səfəri planlaşdırılır.

Rusiya daha əvvəl Ermənistan məhsullarına — çiçəklər, mineral su, şərab, konyak, meyvə və tərəvəz daxil olmaqla — fitosanitar tələbləri əsas gətirərək məhdudiyyətlər tətbiq etmişdi. Buna baxmayaraq, son parlament seçkilərində baş nazir Nikol Paşinyanın rəhbərlik etdiyi qərbyönlü qüvvələr qalib gəlib.

Ekspertlər hesab edirlər ki, Ermənistanın Rusiya bazarından yüksək asılılığı səbəbindən Aİ-nin mümkün dəstəyi qısa müddətdə tam iqtisadi təsiri kompensasiya etməyə bilər.

Qadir, Bizimyol.info