Alimlər Hind okeanının cənub-şərqində yerləşən Diamantina zonasının dərinliklərində indiyədək məlum olan ən böyük və ən sirli “balina məzarlığı”nu aşkar ediblər.

Bizimyol.info xəbər verir ki, "Nature" jurnalında dərc edilən araşdırmaya görə, okeanın 7 min metrədək dərinliyində minlərlə kilometrə yayılan qədim balina qalıqları tapılıb.

İtaliya, Çin və Yeni Zelandiyadan olan tədqiqatçılar 2023-cü ildə xüsusi sualtı aparat vasitəsilə bölgədə 32 dəfə dərinlik dalışı həyata keçiriblər. Nəticədə 485 balina skeleti və aktiv şəkildə parçalanmaqda olan beş balina cəsədi qeydə alınıb. Alimlər hesab edir ki, bu ərazi milyonlarla il ərzində dənizin dibinə çökən balinaların toplandığı unikal “super koridor” rolunu oynayıb.

Araşdırma zamanı təxminən 5,3 milyon il əvvələ aid dimdikli balina növünün qalıqları, eləcə də elmə əvvəllər məlum olmayan yeni növlər aşkarlanıb. Ən diqqətçəkən məqamlardan biri isə balina skeletləri ətrafında formalaşan qeyri-adi ekosistem olub. Qaranlıq və yüksək təzyiqli dərinliklərdə balina qalıqları minlərlə canlı üçün həyat mənbəyinə çevrilib.

Alimlər burada sümük yeyən qurdlar, molyusklar, dəniz ulduzları, xərçəngkimilər və kimyəvi maddələrlə qidalanan nadir canlı növləri müşahidə ediblər. Tədqiqat müəllifləri bildirirlər ki, bu canlıların bir çoxu elm üçün tamamilə yeni növ ola bilər.

Mütəxəssislərin fikrincə, Diamantina zonası həm qədim balinaların təkamül tarixini öyrənmək, həm də dərin okean ekosistemlərinin necə formalaşdığını anlamaq baxımından böyük əhəmiyyət daşıyır. Araşdırma göstərir ki, okeanın ən əlçatmaz nöqtələrində belə həyat milyonlarla il ərzində öz inkişafını davam etdirib.

Qadir, Bizimyol.info