Ötən ilin oktyabrında Bakıda güclü yağışlar zamanı küçələrdə, tunellərdə sel sularının altında qalan avtomobillərə də ciddi ziyan dəymişdi. Onlardan biri də 77-FQ-157 dövlət-qeydiyyat nişanlı “Hyundai Elantra” markalı avtomobil olub.
Bizimyol.info xəbər verir ki, metronun “Koroğlu” stansiyasının yaxınlığında düşdüyü sel sularından ziyan çəkən avtomobilin sahibi ziyanın ödənilməsi üçün sığorta şirkətinə müraciət edib. Həmin dövrdə avtomobil sığortalı olub.
Hadisə vaxtı sürücü baş verənlər barədə sığorta şirkətinə dərhal məlumat verib. Qarşı tərəf avtomobilə dəymiş zərərin qiymətləndirilməsinə dair hesabat tərtib edib. Hesabata görə, avtomobilə dəymiş zərərin ümumi məbləği 1017 manat olub.
Lakin sığorta şirkəti zərəri ödəməkdən imtina edib. İddia edib ki, araşdırma aparıblar və belə nəticəyə gəliblər ki, avtomobilin sürücüsü – sahibi hadisə vaxtı hadisənin – zərərin qarşısını ala bilərdi, lakin bunu eləməyib. Başqa sözlə, qəsdən maşını su gölməçəsinin içinə sürüb, nəticədə avtomobilə ciddi ziyan dəyib.
“Bakıda yağan leysan yağışları nəticəsində “Koroğlu” metrostansiyasına yaxın ərazidə sel suları əmələ gəlmişdi. Həmin sel sularının yaratdığı maneə nəticəsində o yoldan keçmək qeyri-mümkün idi. Yolda sel sularının səviyyəsini də dəqiq müəyyən etmək mümkün deyildi. Başqa alternativ yol olmadığından və işə getmək vacib olduğundan həmin yoldan keçmək məcburiyyətində qaldım. Nəticədə o yoldakı sel suları avtomobilimə ciddi zərər yetirdi. Baş vermiş hadisə avtomobilimdə quraşdırılmış videoqeydiyyat funksiyasına malik kamera vasitəsilə qeydiyyata alınıb.
Sığorta şirkəti iddia edir ki, su gölməçəsinə daxil olub hərəkəti davam etdirməyim, avtomobilimə ziyan dəyməsi mənim tərəfimdən qəsdən edilmiş hərəkətdir. Bu əsasla da sığorta ödənişindən imtina olunur. Bu isə tam absurddur. Avtomobil yenidir və təbii ki, mən öz avtomobilimə ziyan vurmaq niyyətində ola bilməzdim. Baş vermiş vəziyyət təbiət hadisəsidir. Sığorta müqaviləsində sığorta təminatı kimi sel, daşqın və s. hallar nəzərdə tutulub. Bu səbəbdən də sığorta ödənişini verməkdən imtina tam əsassız və qanunsuzdur”.
Məhkəmə avtomobil sahibinin iddiasını təmin edib. Qərar verilib ki, sığorta şirkəti güclü yağışlar nəticəsində avtomobilə dəymiş 1017 manatlıq ziyanı ödəsin.
Şirkət bu qərardan apellyasiya şikayəti versə də, nəticə dəyişməyib – qərar qüvvədə saxlanılıb.
Aytən, Bizimyol.info
