ABŞ və İran arasında Hörmüz boğazına nəzarət uğrunda gərginlik daha da artır. Tərəflər qarşılıqlı hava zərbələrini davam etdirir, lakin heç birinin geri addım atmaq niyyətində olduğu görünmür.

ABŞ administrasiyası diplomatiyaya açıq olduğunu bildirsə də, İran strateji əhəmiyyət daşıyan Hörmüz boğazında mövqelərini qoruyur. Boğazdan dünya neft daşımalarının təxminən beşdə biri keçir.

Ekspertlər hesab edirlər ki, Vaşinqtonun yalnız hava zərbələri ilə Tehrana təzyiq göstərmək strategiyasının imkanları məhduddur. Onların fikrincə, İran uzun müddətdir raket sistemlərini və digər hərbi imkanlarını gizlətməyə hazırlaşdığı üçün bu üsulla ölkənin müqavimətini qırmaq çətindir.

ABŞ rəsmiləri bildirirlər ki, hərbi əməliyyatlarla yanaşı, diplomatik danışıqlar üçün də imkanlar qalır. Lakin tərəflər arasında etimadsızlıq və qarşılıqlı ittihamlar sülh yolunda əsas maneələrdən biri olaraq qalır.

Analitiklər xəbərdarlıq edirlər ki, münaqişənin genişlənməsi Hörmüz boğazı ilə yanaşı, Bab əl-Məndəb boğazında da gərginliyi artıra və qlobal enerji bazarına ciddi təsir göstərə bilər.

Qadir, Bizimyol.info