ABŞ Prezidenti Donald Tramp Kanada məhsullarının böyük hissəsinə 50 faiz həcmində yeni gömrük rüsumu tətbiq etmək qərarı verib.

Bizimyol.info xəbər verir ki, Ağ Evin açıqlamasına görə, bu addım Kanadanın ABŞ-ın əvvəlki tariflərinə cavab tədbirləri görməsi və Amerika avtomobilləri, spirtli içkiləri, süd məhsulları ilə bağlı “ədalətsiz ticarət siyasəti” yürütməsi ilə əsaslandırılır.

Məlumata görə, yeni tariflər şərab, xokkey ləvazimatları, sement və ABŞ–Meksika–Kanada Ticarət Sazişi (USMCA) çərçivəsində indiyədək rüsumdan azad olan bir sıra məhsullara da şamil ediləcək.

Bununla yanaşı, enerji məhsulları, balıq, strateji əhəmiyyətli minerallar, kalium gübrəsi, eləcə də milli təhlükəsizlik məqsədilə artıq ayrıca tarif tətbiq olunan polad və alüminium məhsulları yeni qərardan kənarda qalacaq.

Ağ Ev bildirib ki, tariflər 30 gün sonra qüvvəyə minəcək və bu müddət ərzində Vaşinqtonla Ottava arasında danışıqların aparılması üçün imkan saxlanılır.

Kanadanın Baş naziri Mark Karni isə hökumətinin ticarət mübahisələrinin həlli üçün ABŞ-a hərtərəfli təkliflər təqdim etdiyini bildirib. Onun sözlərinə görə, Tramp administrasiyasının əvvəlki tarifləri iki ölkə arasında qüvvədə olan ticarət sazişinin şərtlərini pozub.

Ağ Ev Kanadanı ABŞ istehsalı olan avtomobillərə, spirtli içkilərə və süd məhsullarına qarşı ayrı-seçkilik etməkdə ittiham edib. Tramp administrasiyası hesab edir ki, Ottavanın cavab tədbirləri amerikalı istehsalçıların maraqlarına zərər vurur.

İqtisadçılar xəbərdarlıq edirlər ki, yeni tariflər Şimali Amerikada ticarət gərginliyini daha da artıraraq inflyasiyanın yüksəlməsinə və iki ölkə arasındakı iqtisadi münasibətlərin zəifləməsinə səbəb ola bilər.

Bizimyol.info