Venesuelanın şimalında baş vermiş dağıdıcı zəlzələdən sonra ölkədə genişmiqyaslı axtarış-xilasetmə əməliyyatları davam edir.

Bizimyol.info xəbər verir ki, "Associated Press" agentliyinin yaydığı məlumata görə, zəlzələnin episentri ölkənin sahilyanı bölgəsində yerləşib. Ən böyük dağıntılar isə La-Quayra ştatında qeydə alınıb.

Ölkə prezidentinin səlahiyyətlərini icra edən Delsi Rodriges La-Quayra ştatını rəsmi olaraq fəlakət zonası elan edib.

Səhiyyə naziri Karlos Alvaradonun sözlərinə görə, tibb müəssisələrinə 235 nəfərin meyiti gətirilib. Onların bir çoxu xəstəxanaya çatdırıldıqdan sonra dünyasını dəyişib.

Bundan başqa, 4 300-dən çox şəxs müxtəlif dərəcəli bədən xəsarətləri alıb.

Yerli hakimiyyət orqanları və ABŞ Geoloji Xidməti də daxil olmaqla beynəlxalq seysmoloji qurumlar bildirirlər ki, açıqlanan rəqəmlər dağıntılar altında aparılan işlərin hələ ilkin mərhələsini əks etdirir.

Hazırda itkin düşənlərin sayının minlərlə nəfərlə ölçüldüyü bildirilir ki, bu da fəlakətin miqyasının son dərəcə böyük olduğunu göstərir.

La-Quayrada onlarla çoxmərtəbəli yaşayış binası və kommersiya obyektləri dağılıb. Dağıntılar altında yüzlərlə ailənin qaldığı ehtimal edilir.

Fəlakət bölgəsində vəziyyət həyati əhəmiyyət daşıyan infrastrukturun ciddi zədələnməsi səbəbindən daha da çətinləşib.

La-Quayrada yerləşən və ölkənin əsas hava qapısı hesab olunan Simon Bolivar Beynəlxalq Hava Limanı ciddi struktur zədələri aldığından kommersiya reysləri üçün tamamilə bağlanıb. Bu isə humanitar yardımın bölgəyə operativ çatdırılmasını xeyli çətinləşdirir.

Bölgədə elektrik enerjisi, içməli su və qaz təchizatında fasilələr yaranıb. Seysmoloqlar 20-dən çox təkrar yeraltı təkan qeydə alıblar ki, bu da dağıntılar altında çalışan xilasedicilər üçün əlavə təhlükə yaradır.

Xilasetmə əməliyyatlarına mülki müdafiə qüvvələri, polis əməkdaşları, həmçinin Dominikan Respublikası və ABŞ daxil olmaqla digər ölkələrdən gələn xilasedici qruplar cəlb olunub.

Bizimyol.info