Süni intellektin maliyyə sektorunda tətbiqi aktivlərin idarə olunması üzrə peşəkar məsləhətçilərin rolunu köklü şəkildə dəyişdirib. Ekspertlərin fikrincə, likvid aktivləri 100 min dollardan 1 milyon dollara qədər olan müştərilər yaxın gələcəkdə tamamilə avtomatlaşdırılmış sistemlərin xidmətinə keçirilə bilər.
Bizimyol.info xəbər verir ki, “Bloomberg”in məlumatına görə, “McKinsey & Co” şirkətinin mütəxəssisləri hesab edirlər ki, bu seqmentdə süni intellektin təqdim etdiyi xidmətlərin keyfiyyəti artıq ənənəvi şəxsi bank xidmətləri ilə müqayisə oluna biləcək səviyyəyə çatıb. Bu isə standart maliyyə məsləhətçilərinin əhəmiyyətini azaldır.
“McKinsey & Co”nun baş tərəfdaşı Debaşiş Patnaik bildirib ki, fəaliyyəti yalnız standart tövsiyələr verməklə məhdudlaşan məsləhətçilərin rolu artıq aktuallığını itirib. Yeni şəraitdə aktiv idarəçiləri diqqəti ultra varlı müştərilərin unikal ehtiyaclarına yönəltməlidirlər. Burada yüksək emosional dayanıqlıq və mürəkkəb ailə münasibətlərini idarə etmək bacarığı əsas rol oynayır.
Onun sözlərinə görə, mirasın bölüşdürülməsi və ya bazar çöküşü zamanı psixoloji dəstək kimi həssas məsələlərdə insan faktorunun vəziyyəti düzgün qiymətləndirməsi süni intellektlə müqayisədə əsas üstünlük olaraq qalır.
İş yerlərinin azalacağı ilə bağlı narahatlıqlara baxmayaraq, maliyyə institutları məhsuldarlığı artırmaq üçün süni intellektdən fəal şəkildə istifadə edir. Bu isə bəzi hallarda yeni işçilərin işə götürülməsinə səbəb olub.
“Citigroup Inc.” özəl bankçılıq bölmələrinə yüzlərlə yeni əməkdaş cəlb etməyi planlaşdırır. Eyni zamanda şirkət investisiya portfellərinin ani təhlili üçün süni intellekt əsaslı proqram təminatını tətbiq edir.
“Citi”nin varlı müştərilərlə iş üzrə analitika departamentinin rəhbəri Co Bonannonun sözlərinə görə, yeni alətlər bankirlərə baş investisiya direktorunun məlumatları əsasında müştərilər üçün fərdiləşdirilmiş mesajları operativ şəkildə hazırlamağa imkan verir.
Bununla paralel olaraq, İsveçrənin maliyyə nəhəngi “UBS Group AG” artıq ABŞ-dakı məsləhətçi komandalarının 90 faizində daxili süni intellekt platformalarını inteqrasiya edib. Bu texnologiyalar bankirlərə müştərilər barədə fərdiləşdirilmiş məlumat təqdim edərək əməliyyat səmərəliliyini artırmağa kömək edir.
“OpenAI”, “Anthropic PBC” və “Alphabet Inc.” kimi texnologiya şirkətlərinin həlləri isə istifadəçilərə vergi strategiyalarını və investisiya portfellərini müstəqil şəkildə modelləşdirməyə imkan yaradır. Bu da ənənəvi kapital idarəçiliyi modellərinə təzyiqi artırır.
Texnologiyaların inkişafı tamamilə yeni bacarıqlara tələbat formalaşdırıb. Şirkətlər artıq fərdiləşdirmə memarları, davranış məlumatlarının analitikləri və insan–süni intellekt qarşılıqlı əlaqəsinə nəzarət üzrə mütəxəssisləri aktiv şəkildə işə götürürlər.
Debaşiş Patnaikin sözlərinə görə, maliyyə sahəsində ekspert biliklərini texniki bacarıqlarla birləşdirən bu hibrid peşəkarlar hazırda əmək bazarında ən çox tələb olunan və ən çətin tapılan kadrlar hesab olunur. Bu isə aktivlərin idarə olunması sənayesində kadr siyasətinin əsaslı şəkildə dəyişdiyini göstərir.
Qadir, Bizimyol.info
