ABŞ və İran 19 iyunda İsveçrənin Bürgenştok şəhərində əvvəlcədən razılaşdırılmış sazişin icra mexanizmlərini müzakirə etmək üçün ilkin danışıqlar aparacaq.

Bizimyol.info xəbər verir ki, bu barədə İsveçrə Xarici İşlər Nazirliyi (XİN) məlumat yayıb.

Bildirilir ki, görüşdə yalnız iki ölkənin nümayəndələri deyil, həm də vasitəçi rolunda çıxış edən bir sıra dövlətlərin nümayəndələri iştirak edəcək. Onların arasında Pakistan, Qətər və digər iştirakçı ölkələrin diplomatları yer alır.

İsveçrə XİN-in açıqlamasına əsasən, tərəflər Bürgenştokda keçiriləcək görüşdə əldə olunmuş razılaşmanın praktiki icrasına dair ilkin koordinasiya məsələlərini müzakirə edəcəklər. Buraya sazişin mərhələli şəkildə həyata keçirilməsi, tərəflərin öhdəliklərinin icrası və texniki detallarla bağlı ilkin razılaşmalar daxildir.

Rəsmi qurum hələlik görüşün tam gündəliyi, konkret müzakirə mövzuları və danışıqların müddəti barədə əlavə məlumat açıqlamayıb.

Diplomatik mənbələrin qiymətləndirməsinə görə, bu formatda keçirilən ilkin görüşlər adətən tərəflər arasında etimadın artırılması və gələcək genişmiqyaslı danışıqların hazırlanması məqsədi daşıyır. Bürgenştokda planlaşdırılan görüşün nəticələri gələcək mərhələdə İran–ABŞ münasibətlərinin istiqamətinə təsir göstərə bilər.

Bizimyol.info