İranın üç tanker gəmisi son iki ay ərzində ilk dəfə olaraq ABŞ Hərbi Dəniz Qüvvələrinin mövcud olduğu zonadan keçərək Hörmüz boğazı ətrafındakı ərazini tərk etməyi bacarıb.

Bizimyol.info xəbər verir ki, ABŞ-nin “CNBC” biznes nəşrinin Kpler analitik şirkətinin hesabatına istinadla verdiyi məlumata görə, həmin gəmilər ümumilikdə təxminən 5 milyon barrel xam neft daşıyıb.

İran Dövlət Milli Tanker Şirkətinə məxsus və ABŞ sanksiyaları altında olan iki supertanker — "Diona" və "Hero 2" — blokada zonasını keçərək 3,8 milyon barrel nefti daşımaqla təhlükəsiz şəkildə hərəkət edib.

Çərşənbə günü isə İrana bağlı üçüncü tanker ABŞ-nin nəzarət xəttini tərk edib. Bu gəmidə əlavə olaraq 1 milyon barrel neft olub.

“Windward” şirkətinin dəniz kəşfiyyatı üzrə baş analitiki Mişel Vize Bokmann bildirib ki, bu gəmilərin blokadadan çıxması digər tankerlərin də İranla ticarətin tam bərpasına hazırlaşdığını göstərə bilər.

Dəniz blokadasının qırılması ABŞ və İran arasında imzalanmış, təxminən dörd ay davam edən münaqişənin dayandırılmasını hədəfləyən anlaşmadan sonra baş verib.

Razılaşmanın yekun sənədinin rəsmi imzalanma mərasimi cümə günü Cenevrə şəhərində planlaşdırılır. Gözlənilir ki, bu saziş Hörmüz boğazının yenidən açılmasına və İran karbohidrogenlərinin satışına qoyulan məhdudiyyətlərin aradan qaldırılmasına imkan verəcək.

Münaqişədən əvvəl dünya neft tədarükünün təxminən beşdə biri bu boğazdan keçirdi. Lakin döyüşlər zamanı bu strateji su yolu faktiki olaraq bağlanmışdı.

“Lloyd’s List Intelligence” analitik şirkəti isə bildirir ki, dəniz sektoru son xəbərləri ehtiyatlı şübhə ilə qarşılayır. Sığorta şirkətləri hələ də yüksək hərbi risk ödənişlərini tələb edir və gəmiçilik təhlükəsizliyinə dair güclü sübutlar istəyir.

Sektor baş verənləri tam normallaşma kimi deyil, daha çox kövrək bir fasilə kimi qiymətləndirir.

Bizimyol.info