Böyük Britaniyada Böyük Mançesterin meri Endi Börnem gələcəkdə baş nazir olarsa, ölkənin su və enerji sektorlarının genişmiqyaslı şəkildə dövlət nəzarətinə qaytarılması onun əsas siyasi prioritetlərindən biri ola bilər.

Bizimyol.info xəbər verir ki, bu barədə ona yaxın mənbələr məlumat verib.

Məlumata görə, Börnem və onun siyasi komandasına yaxın şəxslər hesab edirlər ki, kommunal xidmətlər yenidən ictimai nəzarətə keçərsə, həm xidmət keyfiyyəti yaxşılaşa, həm də əhali üçün xərclər azala bilər. Planlar həyata keçirilərsə, bu, 1980-ci illərdə aparılan özəlləşdirmələrdən sonra Britaniya iqtisadiyyatında ən böyük struktur dəyişikliklərindən biri olacaq.

Söhbət xüsusilə su sektorundan gedir. Çətin maliyyə vəziyyətində olan Thames Water şirkətinin dövlətin xüsusi idarəçiliyinə verilməsi və daha sonra mərhələli şəkildə ictimai mülkiyyətə qaytarılması əsas müzakirə mövzusudur. Hazırkı hökumət bu prosesin 100 milyard funt sterlinqə başa gələ biləcəyini iddia etsə də, bəzi hüquq ekspertləri xərclərin daha aşağı ola biləcəyini bildirirlər.

Börnemə yaxın mənbələr qeyd edir ki, gələcəkdə digər su şirkətləri də problemlərlə üzləşdikcə və ya lisenziya müddəti bitdikcə dövlət nəzarətinə keçə bilər. Uzunmüddətli hədəf isə on il ərzində su sektorunun böyük hissəsini ictimai idarəçiliyə qaytarmaqdır.

Enerji sektorunda da oxşar dəyişikliklər nəzərdə tutulur. Planlara görə, elektrik şəbəkələrinin idarə olunması dövlətə keçə bilər, lakin enerji istehsalı və satışının özəl şirkətlərdə qalması ehtimal edilir. Model kimi Berlin və Parisdə tətbiq olunan qarışıq idarəetmə sistemləri göstərilir.

Bununla yanaşı, tənqidçilər bu cür genişmiqyaslı dövlətləşdirmənin büdcəyə böyük yük gətirəcəyini və vergi artımı olmadan maliyyələşdirilməsinin çətin olacağını bildirirlər. Börnem isə daha əvvəl kirayə qiymətlərinin dondurulması, ictimai nəqliyyatda qiymət məhdudiyyəti və elektrik xərclərində əlavə rüsumların ləğvi kimi sosial-iqtisadi tədbirlər təklif edib.

Planların gələcəkdə Böyük Britaniyanın iqtisadi siyasətində ciddi dəyişikliklərə səbəb ola biləcəyi qeyd olunur.

Bizimyol.info