ABŞ Prezidenti Donald Tramp yenidən İranla müharibənin dayandırılması üzrə razılaşmanın yaxın olduğunu bəyan edib. O bildirib ki, Vaşinqton və Tehran artıq bu həftəsonu saziş imzalaya bilər.

Bizimyol.info xəbər verir ki, Trampın sözlərinə görə, mümkün razılaşma üç aydır davam edən və həm ABŞ daxilində, həm də qlobal enerji bazarlarında ciddi narahatlıq yaradan müharibənin sona çatmasına yol açacaq.

Prezident hətta vitse-prezident Ceyms Devid Vensi sazişin imzalanma mərasiminə göndərməyi planlaşdırdığını açıqlayıb. Lakin İran Xarici İşlər Nazirliyinin nümayəndəsi dövlət televiziyasına bildirib ki, vasitəçilərin fəal işləməsinə baxmayaraq, hələ yekun razılıq əldə olunmayıb.

Tramp son həftələrdə bir neçə dəfə İranla razılaşmanın astanasında olduqlarını desə də, bu açıqlamalar nəticəsiz qalıb. Bununla belə, Ağ Ev rəhbəri bu dəfə daha əmin danışıb. O bildirib ki, İran ağır zərbələr alıb və indi razılaşmaya ABŞ-dan daha çox ehtiyac duyur.

Məlumata görə, razılaşma İranın nüvə silahı əldə etməsinin qarşısını almağı nəzərdə tutur. Tramp həmçinin İranın ali lideri ayətullah Müctəba Xameneinin də sənədə razılıq verməyə hazır olduğunu iddia edib.

Münaqişənin gərginləşməsi fonunda Tramp bir neçə dəfə İrana qarşı daha sərt hərbi addımlar atacağı ilə hədələyib. Hətta İranın əsas neft mərkəzlərindən biri olan Xarq adasının nəzarətə götürülməsi variantı da gündəmə gəlmişdi. Lakin daha sonra o, amerikalıların yeni genişmiqyaslı müharibəyə hazır olub-olmaması ilə bağlı sual qaldıraraq mövqeyini yumşaldıb.

Ekspertlər hesab edirlər ki, Tramp həm sərt mövqe nümayiş etdirməyə, həm də diplomatik uğur əldə etməyə çalışır. Beynəlxalq Böhran Qrupunun eksperti Əli Vaezin fikrincə, Tramp üçün əsas problem “qalib obrazı” ilə müharibədən çıxış yolu arasında balans tapmaqdır.

Müharibə və İran məsələsi gələn həftə Fransada keçiriləcək G7 sammitinin əsas mövzularından biri olacaq. Tramp isə razılaşmanın sammitdən əvvəl əldə olunacağına ümid etdiyini bildirib.

Qadir, Bizimyol.info