Böyük Britaniyada müdafiə naziri Con Hilinin gözlənilməz istefası Baş nazir Kir Starmer hökuməti üçün ciddi siyasi zərbəyə çevrilib. Hili istefa məktubunda hökuməti ölkənin təhlükəsizliyini lazımi səviyyədə maliyyələşdirməməkdə ittiham edib və Müdafiə İnvestisiya Planının (DIP) real təhlükələr qarşısında kifayət etmədiyini bildirib.

Bizimyol.info xəbər verir ki, nazirin sözlərinə görə, hökumət ordunun ehtiyac duyduğu resursları təmin etməyib. O vurğulayıb ki, mövcud plan silahlı qüvvələrin döyüş hazırlığını zəiflədə və ölkənin təhlükəsizliyini risk altına sala bilər. Hili xüsusilə Rusiyadan gələn potensial təhlükələrə diqqət çəkərək müdafiə xərclərinin daha sürətlə artırılmasının vacibliyini qeyd edib.

İstefadan dərhal sonra təhlükəsizlik naziri Den Carvis yeni müdafiə naziri təyin edilib. Lakin bununla böhran səngiməyib. Silahlı qüvvələr naziri Al Karns və bir neçə yüksək vəzifəli əməkdaş da vəzifələrindən ayrılıblar. Karns hökumətin yeni idarəetmə yanaşmasına ehtiyac duyduğunu bildirib.

Məsələ Starmer üçün xüsusilə həssas vaxtda baş verib. Baş nazir yaxın günlərdə G7 liderləri ilə görüşə və daha sonra NATO sammitinə qatılmağa hazırlaşır. Belə bir dönəmdə müdafiə naziri ilə açıq qarşıdurma onun beynəlxalq nüfuzuna da zərbə vurur.

Məlumata görə, hökumət müdafiə xərclərini 2030-cu ilə qədər ÜDM-in 2,68 faizinə çatdırmağı planlaşdırır. Hili isə bunun yetərli olmadığını və göstəricinin ən azı 3 faiz olmalı olduğunu müdafiə edib.

Leyborist Partiyası daxilində də narazılıq artır. Bir sıra deputatlar Starmerin mövqeyinin zəiflədiyini düşünür. Siyasi müşahidəçilər hesab edir ki, bu istefa hökumət daxilindəki fikir ayrılıqlarını açıq şəkildə üzə çıxarıb və yaxın aylarda Britaniya siyasətində yeni gərginliklər yarada bilər.

Qadir, Bizimyol.info