Narendra Modi Hindistanın müasir tarixində ən uzun müddət fasiləsiz olaraq baş nazir vəzifəsində çalışan siyasətçi kimi rekord müəyyənləşdirib.

Bizimyol.info xəbər verir ki, iyunun 10-da Modinin ilk dəfə baş nazir kimi and içməsindən 4 399 gün ötür. O, bu vəzifəyə ilk dəfə 26 may 2014-cü ildə başlayıb. Beləliklə, Hindistanın hazırkı hökumət başçısı müstəqil Hindistanın ilk baş naziri Cəvahirləl Nehrunun rekordunu geridə qoyub.

Nehru ilk ümumi seçkilərdən sonra 13 may 1952-ci ildə and içərək baş nazir olmuş və 27 may 1964-cü ildə vəfatınadək bu postda fasiləsiz 4 398 gün çalışıb. Onun rekordu 60 ildən artıq qüvvədə qalıb.

2025-ci il iyulun 25-də Modi daha bir tarixi göstəricini yeniləyib. O, Indira Gandhinin baş nazir postunda ən uzun fasiləsiz fəaliyyət rekordunu geridə qoyub. İndira Qandi 24 yanvar 1966-cı ildən 24 mart 1977-ci ilədək ümumilikdə 4 077 gün fasiləsiz olaraq hökumətə rəhbərlik edib.

Bundan əvvəl Modi, Nehrudan sonra ardıcıl üç dəfə parlament seçkilərində qalib gələn ilk fəaliyyət göstərən baş nazir olub.

“Hindustan Times” nəşri qeyd edir ki, bu rekord Hindistanda böyük dəyişikliklərin yaşandığı dövrdə qeydə alınıb. Nehru ölkəyə müstəqilliyin ilk illərində rəhbərlik edərkən Hindistanın əhalisi təxminən 340 milyon nəfər idi. Modi 2014-cü ildə hakimiyyətə gələndə isə əhali sayı 1,31 milyardı keçmişdi və hazırda bu rəqəm 1,46 milyarddan çoxdur.

Ölkədə demokratik sistemin miqyası da xeyli genişlənib. 1951–1952-ci illərdə keçirilən ilk ümumi seçkilərdə 53 siyasi partiya iştirak etdiyi halda, 2014-cü ildə onların sayı 464-ə, 2024-cü il seçkilərində isə 744-ə çatıb.

İlk ümumi seçkilər zamanı təxminən 170 milyon nəfər seçici olduğu halda, 2014-cü ildə seçicilərin sayı 830 milyonu ötüb.

Bizimyol.info