Almaniya, Fransa, Niderland, Belçika və Lüksemburq Avropa İttifaqına yeni qoşulacaq ölkələrin bəzi hüquqlarının müvəqqəti məhdudlaşdırılmasını təklif edib.
Bizimyol.info xəbər verir ki, “Reuters” agentliyinin məlumatına görə, bu təşəbbüs hüququn aliliyinə əlavə təminatlar yaratmaq məqsədi daşıyır.
Birgə sənəddə qeyd olunur ki, Avropa hökumətləri hazırda Aİ-yə yeni üzvlərin qəbul qaydalarının dəyişdirilib-dəyişdirilməməsi ilə bağlı müzakirələr aparır. Bəzi paytaxtlar daha sərt təminat mexanizmlərinin hazırlanmasını istəyir. Bunun əsas səbəblərindən biri isə Macarıstanın keçmiş baş naziri Viktor Orbán dövründə Aİ-nin yaşadığı problemlərdir.
Sənəddə gələcək üzvlük sazişlərinə daxil edilə biləcək bir sıra variantlar göstərilib. Bunlara yeni monitorinq mexanizmi və demokratiya, media azadlığı kimi sahələrdə ciddi geriləmə baş verdiyi halda tədbirlər görülməsinə imkan verən şərtlər daxildir.
Beş ölkə bildirib ki, Aİ yeni üzv dövlətlər üçün səsvermə hüququnun müvəqqəti və keçid dövrü məhdudiyyətlərini geniş şəkildə müzakirə etməlidir. Xüsusilə də yekdillik tələb olunan sahələrdə belə məhdudiyyətlərin tətbiqi nəzərdən keçirilməlidir.
Bu sahələrə Aİ-nin genişlənməsi, xarici siyasət və büdcə qərarları daxildir. Hazırda həmin məsələlər üzrə qərarların qəbul olunması üçün bütün üzv dövlətlərin razılığı tələb olunur.
Bu arada Ukraynanın Aİ-yə üzvlüyü ilə bağlı müzakirələr də davam edir. “Politico” nəşri yazır ki, Kiyev Fransadakı prezident seçkiləri də daxil olmaqla siyasi problemlər səbəbindən üzvlük prosesinin gecikdirilməsindən narahatdır.
Texniki məsləhətləşmələr çərçivəsində Ukraynanın Avrointeqrasiya prosesi üzrə Budapeştin əksər tələblərinin razılaşdırıldığı bildirilsə də, Ali Radada milli azlıqların təmsilçiliyi məsələsi hələ də həllini tapmayıb və gələcəkdə Aİ ilə əlavə danışıqlar mövzusu ola bilər.
Polşanın baş naziri Donald Tusk isə bildirib ki, ölkəsi Ukraynanın Aİ-yə üzvlüklə bağlı danışıqlarının başlanmasına mane olmayacaq. "Bununla belə, Kiyevə xüsusi güzəştlər edilməməlidir", - deyə o əlavə edib.
Bizimyol.info
