ABŞ prezidenti Donald Trump Yaxın Şərqdə gərginliyin yenidən artması fonunda İsrail və İran arasında davam edən qarşılıqlı hücumlarla bağlı çağırış edib. O, tərəfləri hərbi əməliyyatları dərhal dayandırmağa və vəziyyətin daha da gərginləşməsinə yol verməməyə səsləyib.

Bizimyol.info xəbər verir ki, Tramp bu barədə özünün "Truth Social" platformasında paylaşım edib.

“İsrail və İran dərhal atəşi dayandırmalıdır”, — deyə ABŞ prezidenti bildirib.

Son günlər Yaxın Şərqdə təhlükəsizlik vəziyyəti yenidən kəskinləşib. İsrail və İran arasında qarşılıqlı raket və hava zərbələrinin intensivləşməsi regionda genişmiqyaslı münaqişə riskini artırıb. Beynəlxalq ictimaiyyət tərəfləri təmkinli olmağa və diplomatik kanallara üstünlük verməyə çağırır.

Ekspertlər hesab edirlər ki, vəziyyətin nəzarətdən çıxması təkcə region üçün deyil, qlobal təhlükəsizlik və enerji bazarları üçün də ciddi nəticələr yarada bilər. ABŞ administrasiyası da tərəflər arasında gərginliyin azaldılması istiqamətində diplomatik səylərin vacibliyini vurğulayır.

Hələlik İsrail və İran rəsmiləri Trampın çağırışına rəsmi münasibət bildirməyiblər.

Qadir, Bizimyol.info