Amerikalı milyarder Elon Mask yenidən dünya iqtisadi tarixində rekord qırıb. Onun raket istehsalçısı "SpaceX" süni intellekt və sosial media şirkəti "xAI"ni satın aldıqdan sonra Maskın ümumi sərvəti 800 milyard dollar həddini keçərək 852 milyard dollara yüksəlib.
Bizimyol.info xəbər verir ki, "Forbes" jurnalının hesablamalarına görə, bazar ertəsi axşam elan edilən bu sövdələşmə Maskın sərvətini cəmi bir gündə 84 milyard dollar artırıb.
Razılaşmaya əsasən, "SpaceX" və "xAI"nin birləşmiş dəyəri 1,25 trilyon dollar olaraq qiymətləndirilib. Sövdələşmədən əvvəl Mask SpaceX-in təxminən 42%-nə sahib idi və şirkət 800 milyard dollar dəyərində qiymətləndirilib. Bu payın dəyəri 336 milyard dollar olub. Eyni zamanda, o, "xAI" şirkətinin təxminən 49%-nə sahibdir və bu pay son özəl maliyyələşmə raundunda 122 milyard dollar dəyərində hesablanıb. Birləşmədən sonra "SpaceX" 1 trilyon dollar, "xAI" isə 250 milyard dollar dəyərində qiymətləndirilib. Nəticədə Maskın birləşmiş şirkətdəki 43%-lik payının dəyəri 542 milyard dollara çatıb.
Bu göstərici "SpaceX"i Elon Maskın ən dəyərli aktivinə çevirib. Mask həmçinin "Tesla" şirkətində 12%-lik paya sahibdir ki, bu payın dəyəri 178 milyard dollar olaraq qiymətləndirilir. Bundan başqa, onun 124 milyard dollar dəyərində "Tesla" səhm opsionları var. "Tesla" səhmdarlarının noyabr ayında təsdiqlədiyi yeni maaş paketi isə gələcəkdə Maskın daha 1 trilyon dollara qədər əlavə səhm əldə etməsinə imkan yarada bilər. Bu, şirkətin növbəti 10 il ərzində bazar kapitallaşmasını səkkiz dəfədən çox artırması kimi iddialı hədəflərə bağlıdır.
Qeyd edək ki, bu, Maskın şirkətləri arasında son bir il ərzində baş verən ikinci böyük birləşmədir. Keçən ilin martında o, "xAI" ilə sosial media platforması "X"i (keçmiş Twitter) birləşdirmişdi. Maskın bu sövdələşmələrdə həm alıcı, həm də satıcı kimi çıxış etməsi qiymətləndirmələrlə bağlı müzakirələr yaratsa da, "SpaceX"in bu ilin sonuna qədər "IPO"ya çıxması gözlənildiyindən, şirkətlər yaxın vaxtlarda açıq bazarın ciddi nəzarəti ilə üzləşəcək.
Hazırda Elon Mask dünyanın ikinci ən varlı şəxsi olan "Google"un həmtəsisçisi Lerri Peycdən 578 milyard dollar daha zəngindir və dünyanın ilk trilyonçusu olmağa indiyədək olmadığı qədər yaxındır.
Qadir, Bizimyol.info
