İlkin məlumatlara görə, Filippinin Mindanao sahillərində 359 nəfəri daşıyan bərə batıb və nəticədə ən azı səkkiz nəfər ölüb.

Bizimyol.info xəbər verir ki, yerli medianın məlumatına görə, Mindanaodakı Zamboagna limanından Sulu adasına gedən "M/V Trisha Kerstin 3" bərə texniki nasazlıq səbəbindən Pilas adası sahillərində batıb.

Pilas adasının aid olduğu Basilan əyalətinin meri Arsina Laja Kahing-Nanoh sosial mediada 332 sərnişin və 27 heyət üzvü, ümumilikdə 359 nəfəri daşıyan bərənin batması nəticəsində səkkiz nəfərin həyatını itirdiyini açıqlayıb.

Filippin Sahil Mühafizəsi axtarış-xilasetmə əməliyyatlarının əlaqələndirildiyini və indiyə qədər 138 nəfərin xilas edildiyini açıqlayıb.

116 milyon əhalisi olan arxipelaq milləti olan Filippin keçmişdə çoxsaylı ölümcül bərə qəzaları ilə üzləşib. 2023-cü ildə ölkənin cənubunda bir bərədə baş verən yanğın nəticəsində 30-dan çox insan həlak olmuşdu.