Ermənistanla Türkiyə arasında sərhəd yaxın bir neçə ay ərzində açıla və iki ölkə arasında diplomatik münasibətlər də həmin vaxt yarana bilər.
Bizimyol.info xəbər verir ki, bu barədə Ermənistanın xarici işlər naziri Ararat Mirzoyan bildirib.
“Şəxsən mən Ermənistan-Türkiyə sərhədinin açılmasında heç bir problem görmürəm və Ermənistan-Türkiyə diplomatik münasibətlərinin qurulmasında da heç bir problem yoxdur. Bunu türkiyəli həmkarlarımız da təsdiqləyiblər. Ona görə də mən inanıram ki, qarşıdakı həftələrdə və aylarda biz bu istiqamətdə çox nəzərəçarpacaq irəliləyiş əldə edəcəyik. Bu, bilmirəm, ən çoxu bir neçə aydır. Bu mənim anlayışımdır. İşlərin necə olacağını görəcəyik”, - o, Almaniyanın "Deutsche Welle" media qrupuna müsahibəsində deyib.
Mirzoyanın sözlərinə görə, Türkiyə İrəvanla Bakı arasında münasibətləri normallaşdırmadan Ermənistanla sərhədin açılması prosesini başa çatdıra bilməyəcəyini vurğulayıb. Bununla belə, Mirzoyan qeyd edib ki, Ermənistan və Azərbaycan arasında sülh sazişi indi paraflanıb və bu, Yerevan və Ankaraya ikitərəfli münasibətlər qurmağa imkan verib.
“Türkiyə tərəfi sərhədlərin açılmasına, dəmir yolu xidmətinin bərpasına və birbaşa ikitərəfli ticarətin bərpasına, o cümlədən diplomatik münasibətlərin qurulmasına hazır olduğunu bildirir və nümayiş etdirir”, - deyə Ermənistan XİN rəhbəri əlavə edib.
Ortaq sərhədə baxmayaraq, Ermənistan və Türkiyə arasında diplomatik əlaqələr yoxdur. 2009-cu ildə Sürixdə iki ölkənin xarici işlər nazirləri arasında diplomatik münasibətlərin qurulması və qarşılıqlı münasibətlərin prinsiplərini əks etdirən protokollar imzalanıb, lakin bu sənədlər ratifikasiya olunmayıb.
2018-ci il martın 1-də Ermənistan protokolların ləğvini elan edib. 2021-ci ildə Ermənistan və Türkiyə nizamlanma məsələləri üzrə xüsusi nümayəndələr təyin ediblər.
Bu vəzifəni Ankaradan Türkiyənin ABŞ-dakı keçmiş səfiri Serdar Kılıç, İrəvandan isə parlament sədrinin müavini Ruben Rubinyan alıb.
Sentyabrın 12-də Ermənistan və Türkiyənin xüsusi nümayəndələri Marqara keçid məntəqəsində görüşərək iki ölkə arasında münasibətlərin normallaşdırılması prosesini müzakirə ediblər.
Görüş zamanı xüsusi nümayəndələr 1 iyul 2022-ci il tarixli sazişlərin həyata keçirilməsinə sadiq olduqlarını, yəni üçüncü ölkə vətəndaşları və diplomatik pasportları olan şəxslər üçün sərhədlərin açılmasını təsdiqləyiblər.
Qadir, Bizimyol.info
