“Meta” Los-Ancelesdəki ofisində çalışan 20-dən çox əməkdaşını şəxsi xərclər üçün şirkətin yemək pulundan sui-istifadə etdiyinə görə işdən çıxarıb.

Bizimyol.info “trthaber”ə istinadən xəbər verir ki, işçilərin yemək kreditlərini yeməkdən əlavə camaşırxana üçün yuyucu toz, şərab və sızanaqlara qarşı yastiqciqlar kimi məhsullara sərf etdiyi müəyyən edilib.

“Meta”, böyük korporativ ofislərində işçilərinə pulsuz yemək xidməti təklif edərkən, yemək sifariş etmək üçün yemək xidməti olmayan kiçik ofislərdəki işçilərə müəyyən miqdarda yemək çeki verir. İşçilərə uzun iş saatlarında yemək yemək üçün verilən bu kuponların təyinatından başqa məqsədlər üçün istifadə edildiyi müəyyən edilib.

Daxili araşdırma Los-Ancelesdəki bəzi işçilərin bu yemək kreditlərini qeyri-ərzaq mallarına xərclədiklərini və ya sifarişlərin evlərinə göndərildiyini ortaya qoyub.

Keçən həftə baş verən bu ixtisarlar haqqında ilk olaraq “Financial Times” xəbər verib.

Şirkət təsdiqləyib ki, bu işdən çıxarılmalarla yanaşı, şirkət miqyasında yenidən qurulma prosesi çərçivəsində bəzi işçilərini də fərqli vəzifələrə və yerlərə yönəldib. Lakin şirkət neçə işçinin ixtisar edildiyini açıqlamaqdan imtina edib.

“Meta”, "məhsuldarlıq ili" adlandırdığı dövrdə gəlirlərinin azalmasını aradan qaldırmaq üçün keçən il 20.000-dən çox işçini işdən çıxarıb.

Qadir, Bizimyol.info