ABŞ Prezidenti Donald Tramp İranın silah istehsalı imkanlarının böyük hissəsinin məhv edildiyini iddia edib. Onun sözlərinə görə, İranın hərbi sənaye potensialının təxminən 84 faizi sıradan çıxarılıb.

Bizimyol.info xəbər verir ki, Tramp bu barədə "Newsmax" telekanalına müsahibəsində deyib.

“Onlar böyük ölçüdə silah istehsal etmək qabiliyyətini itiriblər. Söhbət istehsal güclərinin təxminən 84 faizinin məhv edilməsindən gedir”, – deyə ABŞ prezidenti bildirib.

Trampın açıqlaması ABŞ-ın son günlər İran ərazisinə endirdiyi hava zərbələri fonunda səsləndirilib. Vaşinqton bu əməliyyatların İranın hərbi infrastrukturunu zəiflətməyə yönəldiyini bildirir.

ABŞ və İsrail arasında İranla hərbi qarşıdurma bu il fevralın 28-də başlayıb. Münaqişə zamanı həyata keçirilən hava zərbələri nəticəsində İranın ali dini lideri Ayətullah Əli Xamenei də həlak olub.

İyun ayında Vaşinqton və Tehran bütün cəbhələrdə, o cümlədən Livanda döyüş əməliyyatlarının dərhal dayandırılmasını nəzərdə tutan qarşılıqlı anlaşma memorandumu imzalayıblar. Daha sonra İsveçrənin Bürgenştok şəhərində Qətər və Pakistanın vasitəçiliyi ilə tərəflər arasında memorandumun icrası ilə bağlı danışıqlar keçirilib. Qətər və Pakistanın birgə bəyanatında ilk görüşün konstruktiv atmosferdə keçdiyi, tərəflərin gələcək texniki məsləhətləşmələr üçün əsas yaratdığı qeyd olunmuşdu.

Lakin iyulun 8-nə keçən gecə ABŞ İranın Hörmüz boğazı ilə bağlı razılaşmanın şərtlərini pozduğunu əsas gətirərək ölkəyə qarşı genişmiqyaslı hava zərbələrini bərpa edib.

İran Xarici İşlər Nazirliyinin sözçüsü İsmayıl Bəqai isə iyulun 13-də bildirib ki, Tehran ABŞ ilə imzalanmış memorandumun heç bir müddəasını pozmayıb. Onun sözlərinə görə, razılaşmanın icra olunmamasına görə bütün məsuliyyət Vaşinqtonun üzərinə düşür.

Qeyd edək ki, Trampın İranın silah istehsalı potensialının 84 faizinin məhv edilməsi ilə bağlı səsləndirdiyi iddia müstəqil mənbələr tərəfindən təsdiqlənməyib.

Bizimyol.info