Ukrayna Prezidenti Vladimir Zelenski NATO sammiti çərçivəsində müttəfiqlərdən ölkəsinə əlavə hava hücumundan müdafiə sistemlərinin verilməsini tələb etməyə hazırlaşır.

Bizimyol.info xəbər verir ki, Rusiya ordusunun son günlər Kiyevə endirdiyi raket zərbələri fonunda Ukrayna hava müdafiə vasitələrinə ehtiyacın artdığını bildirir. Məlumata görə, bir həftədən az müddətdə Ukrayna paytaxtına iki dəfə hücum edilib, yaşayış binaları zərər görüb və 50-dən çox mülki şəxs həyatını itirib.

Zelenskinin Türkiyədə keçiriləcək NATO sammiti zamanı ABŞ Prezidenti Donald Trampla da görüşü planlaşdırılır. Ukrayna lideri Trampa Rusiyanın hücumlarının güc nümayişi deyil, zəiflik əlaməti olduğunu və Moskvanın sülh danışıqlarına məcbur edilməli olduğunu çatdırmağa çalışacaq.

Ukrayna rəhbərliyi xüsusilə ABŞ istehsalı “Patriot” hava müdafiə sistemlərinin sayının artırılmasını istəyir. Zelenski Avropa ölkələrini anbarlarda saxlanılan bu sistemləri Ukraynaya göndərməyə çağırıb.

Bununla yanaşı, Ukrayna Rusiyanın dərinliklərində yerləşən strateji obyektlərə, o cümlədən neft emalı zavodlarına və hərbi hədəflərə PUA hücumlarını intensivləşdirib. Kiyev bu zərbələrin Rusiyanın yanacaq və enerji sistemlərinə təsir etdiyini bildirir.

NATO Baş katibi Mark Rutte müttəfiqləri Ukraynaya lazımi dəstəyi göstərməyə çağırıb. Kiyev isə qış başlamazdan əvvəl daha güclü mövqedən çıxış etmək və ya diplomatik həll yoluna nail olmaq üçün əlavə hava müdafiə imkanlarının vacib olduğunu vurğulayır.

Bizimyol.info