Şahzadə Harri ilə Britaniya kral ailəsi arasında münasibətlərdə yeni gərginlik yaşanıb.

Bizimyol.info xəbər verir ki, Böyük Britaniyaya xeyriyyə məqsədli səfərə hazırlaşan Sasseks hersoqunun Bukinqem Sarayında qalacağı barədə yayılan məlumat qısa müddət sonra təkzib edilib.

Harrinin sözçüsü bildirib ki, kral tərəfindən edilən yaşayış təklifi son anda geri götürülüb. Onun sözlərinə görə, buna səbəb hersoqun "Associated Newspapers" nəşriyyatına qarşı qaldırdığı məhkəmə işi üzrə qərarın yaxın günlərdə açıqlanacaq olması göstərilib. Sözçü bu qərarı məyusedici adlandırıb və qeyd edib ki, saray həmin məhkəmə prosesinin vaxtını əvvəlcədən bildiyi halda təklifi son anda ləğv edib.

Şahzadə Harri yaxın günlərdə London və Birmingemdə keçiriləcək bir sıra xeyriyyə tədbirlərində iştirak edəcək. O, həmçinin "Invictus Games" (yaralanmış və əlil hərbçilər üçün beynəlxalq idman oyunları) yarışlarının təşviqi ilə bağlı proqramlara qatılacaq. Məlumata görə, həyat yoldaşı Meqan Markl və cütlüyün övladları Londona gəlməyəcək, lakin sonradan Birmingemdə ona qoşula bilərlər.

Britaniya mətbuatının məlumatına əsasən, Harri əvvəlcə ailəsi adından sarayda qalmaq təklifini qəbul etməyib, lakin daha sonra qərarını dəyişərək özü üçün bu təklifi qəbul edib. Bununla belə, Bukinqem Sarayı qısa müddətdə lazımi hazırlıq və personal təminatının mümkün olmadığını bildirib. Saray həmçinin davam edən məhkəmə prosesinin kralın konstitusion mövqeyinə təsir göstərə biləcəyini nəzərə aldığını vurğulayıb.

Bukinqem Sarayı açıqlamasında qeyd edib ki, kral iqamətgahında qonaqların qəbul olunması üçün əvvəlcədən kifayət qədər vaxt verilməsi vacibdir. Bu səbəbdən Harrinin sarayda qalması mümkün olmayıb.

Beləliklə, xeyriyyə məqsədli səfər başlamazdan əvvəl Şahzadə Harri ilə kral ailəsi arasında növbəti fikir ayrılığı ictimaiyyətin diqqət mərkəzinə çevrilib.

Bizimyol.info