Li Çje Myon Koreya müharibəsinin (1950–1953) başlanmasının ildönümü münasibətilə etdiyi çıxışda Koreya yarımadasında davamlı və həqiqi sülhün təmin olunacağını bəyan edib.

Bizimyol.info xəbər verir ki, prezident administrasiyasının yaydığı məlumata görə, Li Çje Myon bildirib ki, ölkə güclü müdafiə potensialı vasitəsilə xalqın və dövlətin təhlükəsizliyini qoruyacaq, eyni zamanda Seul və Pxenyan arasında müharibə təhlükəsinin aradan qalxdığı, qarşıdurmaya ehtiyac qalmadığı bir sülh mühiti yaradacaq.

“Biz elə bir Koreya yarımadası quracağıq ki, burada müharibə qorxusu olmayacaq və heç kəsin silaha sarılmasına ehtiyac qalmayacaq”, – deyə dövlət başçısı vurğulayıb.

Onun sözlərinə görə, bu, ölkənin müdafiəsi naminə həyatını və gəncliyini qurban vermiş qəhrəmanlara göstərilə biləcək ən böyük ehtiramdır.

Prezident qeyd edib ki, Cənubi Koreya müharibənin ağır nəticələrini aradan qaldıraraq beynəlxalq yardımdan asılı ölkədən yardım göstərən dövlətə çevrilib.

“Biz dünya ictimaiyyətinin vaxtilə bizə göstərdiyi dəstəyi geri qaytarmağa borcluyuq”, – deyə Li Çje Myon bildirib.

O əlavə edib ki, hökumət Koreya müharibəsi zamanı Seula dəstək vermiş ölkələrin veteranlarını daha tez-tez Cənubi Koreyaya dəvət etməyi və həmin dövrdə formalaşmış beynəlxalq həmrəylik ruhunu gələcək nəsillərə ötürməyi planlaşdırır.

Prezident bundan bir gün əvvəl Yeonpyeong İsland adasına səfər edib. O, burada hərbçilərlə görüşüb, Dəniz Piyadaları Korpusunun texnikasına baxış keçirib və atış poliqonunda şəxsi olaraq silahdan atəş açıb.

Bizimyol.info