Hər il iyunun 1-də dünya ictimaiyyəti Uşaqların Beynəlxalq Müdafiəsi Gününü qeyd edir. Bu əlamətdar tarix yalnız bayram xarakteri daşımır, eyni zamanda bəşəriyyətin gələcəyi olan uşaqların hüquqlarının qorunması, onların sağlam, təhlükəsiz və firavan mühitdə böyüməsinin təmin edilməsi istiqamətində dövlətlərin üzərinə düşən məsuliyyəti bir daha xatırladır. Müasir dünyada uşaqların müdafiəsi, onların sosial rifahı və keyfiyyətli təhsilə çıxışı dövlət siyasətinin ən mühüm istiqamətlərindən biri hesab olunur.

Uşaqların Beynəlxalq Müdafiəsi Gününün əsası 1950-ci ildə Birləşmiş Millətlər Təşkilatının Baş Assambleyasının qərarı ilə qoyulmuşdur. Həmin dövrdə keçirilən “Qadınların Beynəlxalq Konfransı”nda uşaqların hüquqlarının müdafiəsi, onların müharibələrdən, yoxsulluqdan və ayrı-seçkilikdən qorunması ilə bağlı mühüm təşəbbüslər irəli sürülmüş, 1 iyun tarixinin uşaqların beynəlxalq müdafiəsinə həsr olunması qərara alınmışdır. Sonrakı illərdə BMT tərəfindən “Uşaq Hüquqları Konvensiyası”nın qəbul edilməsi uşaqların hüquqlarının beynəlxalq hüquq normaları çərçivəsində qorunmasına mühüm töhfə vermişdir.

Azərbaycan da müstəqilliyini bərpa etdikdən sonra bu konvensiyaya qoşularaq uşaqların hüquqlarının müdafiəsini dövlət siyasətinin prioritet istiqamətlərindən biri elan etmişdir. Ölkəmizdə uşaqların sağlam, savadlı, vətənpərvər və yüksək mənəvi dəyərlərə malik vətəndaşlar kimi formalaşması üçün mühüm addımlar atılmış, güclü qanunvericilik bazası yaradılmışdır. Azərbaycan Respublikasının Konstitusiyasında uşaqların hüquq və azadlıqlarının qorunması xüsusi yer tutur.

Bu gün Azərbaycanda uşaqların sosial müdafiəsinin gücləndirilməsi, onların təhsil və səhiyyə xidmətlərinə əlçatanlığının artırılması, istedadlı uşaqların inkişaf etdirilməsi istiqamətində ardıcıl dövlət proqramları həyata keçirilir. Son illərdə ölkənin müxtəlif bölgələrində müasir məktəblərin, uşaq bağçalarının, idman və mədəniyyət mərkəzlərinin tikilməsi dövlətin uşaqlara göstərdiyi diqqətin bariz nümunəsidir. Eyni zamanda, uşaqların rəqəmsal biliklərə yiyələnməsi, müasir texnologiyalara çıxış imkanlarının genişləndirilməsi gələcəyin güclü Azərbaycan vətəndaşının formalaşdırılması baxımından mühüm əhəmiyyət daşıyır.

Azərbaycan Respublikasının Prezidenti cənab İlham Əliyev tərəfindən uşaqların rifahının yüksəldilməsi dövlət siyasətinin əsas istiqamətlərindən biri kimi müəyyən edilmişdir. Dövlət başçısının həyata keçirdiyi sosial siyasət nəticəsində ölkədə uşaqların sağlam böyüməsi, onların yüksək təhsil alması, asudə vaxtlarının səmərəli təşkili və sosial müdafiəsinin gücləndirilməsi istiqamətində mühüm nailiyyətlər əldə olunmuşdur. Xüsusilə şəhid ailələrinin və müharibə iştirakçılarının övladlarına göstərilən dövlət qayğısı cəmiyyət tərəfindən yüksək qiymətləndirilir.

Bu istiqamətdə Heydər Əliyev Fondunun fəaliyyəti xüsusi qeyd olunmalıdır. Fondun prezidenti, Azərbaycan Respublikasının Birinci vitse-prezidenti Mehriban xanım Əliyeva tərəfindən uşaqların müdafiəsi, onların sosial rifahının yaxşılaşdırılması, xüsusi qayğıya ehtiyacı olan uşaqların cəmiyyətə inteqrasiyası istiqamətində genişmiqyaslı layihələr həyata keçirilir. Kimsəsiz və valideyn himayəsindən məhrum olmuş uşaqlara göstərilən diqqət, onların təhsil və sağlamlıq problemlərinin həlli, müxtəlif reabilitasiya mərkəzlərinin yaradılması

Azərbaycanın humanist dövlət siyasətinin mühüm göstəricilərindəndir.

Azərbaycanın işğaldan azad olunmuş ərazilərində həyata keçirilən genişmiqyaslı bərpa-quruculuq işləri çərçivəsində uşaqların gələcəyi də xüsusi diqqət mərkəzində saxlanılır. Qarabağ və Şərqi Zəngəzurda inşa olunan yeni məktəblər, uşaq bağçaları və sosial obyektlər həmin bölgələrə qayıdan ailələrin uşaqları üçün müasir şərait yaradılmasına xidmət edir. Bu, həm də dövlətimizin gələcək nəsillərə olan strateji baxışının göstəricisidir.

Uşaqların hüquqlarının qorunması yalnız dövlətin deyil, bütövlükdə cəmiyyətin mənəvi borcudur. Ailə institutunun möhkəmləndirilməsi, milli-mənəvi dəyərlərin uşaqlara aşılanması, onların vətənpərvərlik ruhunda tərbiyə olunması gələcəkdə güclü dövlətin və sağlam cəmiyyətin formalaşmasına xidmət edir. Azərbaycan ailə modeli tarixən uşaqlara sevgi, qayğı və diqqət prinsipləri üzərində qurulmuşdur və bu ənənələr bu gün də uğurla davam etdirilir.

1 İyun – Uşaqların Beynəlxalq Müdafiəsi Günü münasibətilə keçirilən tədbirlər, təşkil olunan sosial layihələr və humanitar aksiyalar bir daha göstərir ki, Azərbaycan dövləti uşaqların xoşbəxt gələcəyi üçün bütün imkanları səfərbər edir. Çünki uşaqlar yalnız ailələrin deyil, bütövlükdə xalqın və dövlətin gələcəyidir.

Bu gün hər bir uşağın gülüşü Azərbaycanın sabahına olan inamın, inkişafın və tərəqqinin rəmzidir. Dövlətimizin həyata keçirdiyi uğurlu siyasət nəticəsində Azərbaycan uşaqları təhlükəsiz, sağlam və firavan gələcəyə doğru inamla addımlayırlar.

Politoloq, Nicat İsmayılov