ABŞ və İran arasında mümkün sülh sazişi ilə bağlı ictimai məkanda ortaya çıxan detallar, İranın ABŞ üzərində təsir rıçaqları qazandığını göstərir.

Bizimyol.info xəbər verir ki, CNN analitiki Stiven Kollinson bu fikri səsləndirib.

Onun sözlərinə görə, Vaşinqtonun İranın bəzi aktivlərinin dondurulmasının aradan qaldırılması və İrana qarşı blokadanın mərhələli şəkildə yumşaldılması kimi addımları, İranı Hörmüz boğazını yenidən açmağa razı salmaq məqsədi daşıyır. Lakin bu cür addımlar faktiki olaraq İranın müharibə nəticəsində əldə etdiyi təsir imkanlarını təsdiqləmiş olur.

Ekspert həmçinin İranın nüvə silahı əldə etməyə çalışmaması ilə bağlı mümkün razılaşmanı ehtiyatla dəyərləndirməyi tövsiyə edir. Onun fikrincə, İranın “yeni liderləri” artıq ABŞ-la qarşıdurmada qələbə qazandıqlarına inanırlar.

Kollinsonun fikrincə, ABŞ prezidenti Donald Tramp üçün təklif olunan sülh sazişinin şərtlərini öz siyasi uğuru kimi təqdim etmək olduqca çətin olacaq. Onun son açıqlamaları demokratlar və həmçinin İran məsələsində sərt mövqe tutan mühafizəkarlar tərəfindən skeptisizm və çaşqınlıqla qarşılanıb. Həmin dairələr hesab edirlər ki, prezident ABŞ üçün əlverişsiz bir razılaşma ilə razılaşa bilər.

23 mayda Tramp bildirmişdi ki, İranla gələcək sazişin layihəsi ümumilikdə razılaşdırılıb. O, Bəhreyn, Misir, İordaniya, Qətər, BƏƏ, Pakistan, Səudiyyə Ərəbistanı və Türkiyə liderləri ilə telefon danışığı apardığını və İranla sülh razılaşması çərçivəsində hazırlanan anlaşma memorandumu barədə müzakirələr etdiyini demişdi. 24 mayda isə ABŞ lideri bəzi məsələlər üzrə hələlik yekun razılaşmanın əldə olunmadığını dəqiqləşdirib.

Bizimyol.info