Bakı biznes-forumu strateji tərəfdaşlığın iqtisadi sütunlarını möhkəmləndirir

2026-cı il aprelin 22-də Bakıda keçirilən Azərbaycan–Latviya biznes-forumu iki ölkə arasında siyasi dialoqun iqtisadi müstəviyə daha sistemli şəkildə daşınmasının bariz nümunəsi kimi qiymətləndirilə bilər.

Azərbaycan Respublikasının Prezidenti cənab İlham Əliyev və Latviya Respublikasının Prezidenti Edqars Rinkeviçs iştirakı ilə baş tutan bu tədbir yalnız ikitərəfli əlaqələrin cari vəziyyətinin müzakirəsi ilə kifayətlənməyərək, gələcək əməkdaşlıq istiqamətlərinin müəyyənləşdirilməsi baxımından da mühüm əhəmiyyət daşıyır.

Son illərdə Azərbaycan ilə Latviya arasında münasibətlər sabit siyasi dialoq, qarşılıqlı hörmət və beynəlxalq platformalarda dəstək prinsipləri üzərində qurulub. Hər iki ölkə Avropa ilə Asiya arasında körpü rolunu oynayan strateji mövqeyə malikdir və bu amil iqtisadi əməkdaşlıq üçün geniş imkanlar yaradır. Bakı biznes-forumu məhz bu potensialın reallaşdırılması üçün praktik platforma rolunu oynadı.

Cənab Prezident İlham Əliyev çıxışında vurğuladı ki, Azərbaycan son illər ərzində iqtisadiyyatın şaxələndirilməsi istiqamətində mühüm uğurlar əldə edib, qeyri-neft sektorunun inkişafı prioritet istiqamətə çevrilib. Bu kontekstdə Latviya şirkətləri üçün ölkəmizdə əlverişli investisiya mühiti, müasir infrastruktur və geniş bazar imkanları təqdim olunur.

Prezident Edqars Rinkeviçs isə öz növbəsində Azərbaycanın regionda artan iqtisadi və logistika rolunu yüksək qiymətləndirdi. O qeyd etdi ki, Latviya üçün Azərbaycanla əməkdaşlıq yalnız ikitərəfli deyil, həm də Avropa ilə Mərkəzi Asiya arasında ticarət və nəqliyyat əlaqələrinin genişləndirilməsi baxımından strateji əhəmiyyət kəsb edir.

Latviyanın liman infrastrukturu və logistika imkanları ilə Azərbaycanın Orta Dəhlizdə oynadığı rol bir-birini tamamlayan amillər kimi çıxış edir. Bu baxımdan, forum çərçivəsində nəqliyyat, logistika, rəqəmsal iqtisadiyyat, kənd təsərrüfatı və enerji sahələrində əməkdaşlığın genişləndirilməsi xüsusi diqqət mərkəzində olub.

Qlobal iqtisadi münasibətlər sistemində baş verən dəyişikliklər fonunda Orta Dəhlizin əhəmiyyəti daha da artmaqdadır. Azərbaycan bu dəhlizin əsas iştirakçılarından biri kimi Şərq-Qərb ticarət marşrutlarının təhlükəsiz və səmərəli şəkildə fəaliyyət göstərməsinə mühüm töhfə verir. Latviya isə Avropa İttifaqı daxilində logistika mərkəzlərindən biri kimi bu marşrutun Avropa ayağını gücləndirə bilər. Bu kontekstdə Bakı biznes-forumu yalnız iqtisadi tədbir deyil, həm də yeni geoiqtisadi reallıqlar fonunda tərəfdaşlığın strateji konturlarını müəyyən edən platforma kimi çıxış etdi.

Azərbaycanın əlverişli investisiya iqlimi, sənaye parkları, azad iqtisadi zonaları və dövlət tərəfindən sahibkarlığa göstərilən dəstək Latviya iş adamları üçün cəlbedici imkanlar yaradır. Eyni zamanda, Latviya şirkətləri Avropa bazarlarına çıxış imkanları və texnoloji bilikləri ilə Azərbaycan iqtisadiyyatına əlavə dəyər gətirə bilər.

Forum çərçivəsində keçirilən ikitərəfli görüşlər, təqdimatlar və müzakirələr real biznes layihələrinin formalaşması üçün zəmin yaratdı. Bu isə yaxın gələcəkdə konkret investisiya layihələrinin və birgə müəssisələrin yaranacağına ümidləri artırır.

İqtisadi əməkdaşlıqla yanaşı, Azərbaycan və Latviya arasında humanitar və mədəni əlaqələr də inkişaf edir. Təhsil, turizm və mədəniyyət sahələrində qarşılıqlı layihələr xalqlar arasında yaxınlaşmanı gücləndirir və bu da öz növbəsində iqtisadi əməkdaşlığa müsbət təsir göstərir.

Aprelin 22-də keçirilən Azərbaycan–Latviya biznes-forumu iki ölkə arasında münasibətlərin yeni mərhələyə qədəm qoyduğunu nümayiş etdirdi. Dövlət başçılarının siyasi iradəsi və biznes dairələrinin marağı bu əməkdaşlığın davamlı və dinamik inkişaf edəcəyinə əsas verir. Bu forum bir daha göstərdi ki, müasir dövrdə iqtisadi diplomatiya dövlətlərarası münasibətlərin əsas hərəkətverici qüvvəsinə çevrilir. Azərbaycan və Latviya isə bu reallığı düzgün qiymətləndirərək qarşılıqlı faydalı tərəfdaşlıq modelini uğurla inkişaf etdirirlər.

Müəllif: Nicat İsmayılov