İsrailin baş naziri Benyamin Netanyahunun məhkəmə prosesi İranla İsrail arasında hərbi əməliyyatlar səbəbilə yaranmış fasilədən sonra bazar günü yenidən davam etdiriləcək.

Bizimyol.info xəbər verir ki, bu barədə məhkəmə sisteminin nümayəndəsi məlumat verib.

Söhbət korrupsiya ittihamları üzrə uzun müddətdir davam edən məhkəmə prosesindən gedir. Proses siyasi qeyri-sabitlik və təhlükəsizlik məsələləri də daxil olmaqla müxtəlif səbəblərə görə dəfələrlə təxirə salınıb. Son fasilə İranla münaqişənin kəskinləşməsi fonunda fövqəladə vəziyyətin elan edilməsi ilə bağlı olub.

Rəsmi açıqlamada bildirilir ki, fövqəladə vəziyyət rejiminin ləğvindən və dövlət qurumlarının tədricən normal fəaliyyətə qayıtmasından sonra məhkəmə iclasları standart formatda davam etdiriləcək. İclasların bazar günündən çərşənbəyədək keçirilməsi planlaşdırılır.

Gözlənilir ki, prosesin yenidən başlanması Netanyahunun siyasi çəkisi və işin İsrailin daxili vəziyyətinə təsiri nəzərə alınaraq həm ölkə daxilində, həm də beynəlxalq səviyyədə böyük diqqət cəlb edəcək.

Qadir, Bizimyol.info