2026-cı ilin yanvarın 1-dən etibarən Almaniyada hərbi xidmət qanunvericiliyində genişmiqyaslı dəyişikliklər qüvvəyə minib və bu, 17–45 yaş arası kişilərin hərəkət azadlığını ciddi şəkildə məhdudlaşdırır. Artıq ölkəni üç aydan uzun müddətə tərk etmək üçün Bundesver tərəfindən rəsmi icazə tələb olunur.

Bizimyol.info xəbər verir ki, "Berliner Zeitung"un məlumatına görə, Hərbi Xidmətin Modernləşdirilməsi Qanununa (WPflG) edilən dəyişiklik ictimaiyyətin diqqətindən demək olar ki, yayınıb. Əsas yenilik 2-ci və 3-cü maddələri əhatə edir: əvvəllər uzun müddətli xarici səfərlər üçün icazə yalnız “gərginlik vəziyyətində” və ya “müdafiə vəziyyətində” tələb olunurdusa, indi bu norma daimi xarakter daşıyır və sülh vaxtında da qüvvədədir. Qayda göstərilən yaşda olan bütün kişilərə tətbiq edilir, səfərin məqsədi – iş, təhsil və ya uzunmüddətli istirahət – fərq etməz.

Almaniya Federal Müdafiə Nazirliyinin nümayəndəsi "Ippen.Media"ya verdiyi açıqlamada yeni tədbirlərin tətbiqini təsdiqləyib. Rəsmi şəxslərin sözlərinə görə, əsas məqsəd müasir və etibarlı hərbi qeydiyyat yaratmaqdır. Nazirlik fövqəladə vəziyyət yarandıqda potensial çağırışçılardan kimlərin xaricdə olduğunu dəqiq bilməlidir. Nazirlik qərarın “əhəmiyyətli” təsirini etiraf edir və artıq bürokratiyanın artmasının qarşısını almaq üçün istisnalar sistemi üzərində işləyir.

Qanuna görə, icazələrin verilməməsi faktiki olaraq nəzərdə tutulmasa da, müraciət prosesi ciddi şəkildə məcburidir. Hazırda Almaniya hökuməti qaydanı pozanlar üçün hansı sanksiyaların tətbiq ediləcəyini açıqlamayıb. Bu islahat Bundesverin 2035-ci ilədək 270 000 nəfərə qədər artırılması strategiyasının bir hissəsidir. Bu proses çərçivəsində 2008-ci ildən sonra doğulan bütün gənclər xidmətə hazır olduqlarını bildirən anket doldurmalı, tibbi müayinə prosesi isə 2026-cı il ərzində kütləvi şəkildə həyata keçiriləcək. Eyni zamanda, xidmətin könüllülük prinsipi hazırkı mərhələdə qorunur.

Bizimyol.info