İranın Qətərdə yerləşən mühüm qaz obyektinə hücumu və Küveytdəki neft emalı zavodlarına endirilən zərbələrdən sonra dünya üzrə neft və təbii qaz qiymətləri kəskin artıb.

Bizimyol.info xəbər verir ki, bazar məlumatlarına görə, Brent markalı neftin qiyməti bir barel üçün 116,38 dollara yüksəlib. Halbuki münaqişədən əvvəl bu göstərici 73 dollardan aşağı idi. ABŞ-ın "WTI" markalı nefti də bahalaşaraq 96,45 dollara çatıb, Avropanın TTF qaz indeksi isə 24% artım göstərib.

Hücum regionun əsas enerji mərkəzlərindən biri olan Ras Laffanda yerləşən mayeləşdirilmiş təbii qaz (LNG) ixrac terminalını hədəf alıb. Qətər dünya LNG təchizatının təxminən 20%-ni təmin edir və bu obyektin fəaliyyətinin dayanması qlobal bazarda çatışmazlıq qorxularını artırıb.

Qiymətlərə əlavə təzyiq Hörmüz boğazı vasitəsilə gəmiçiliyin faktiki olaraq məhdudlaşması ilə bağlı olub. Bu isə neft və qazın daşınmasını çətinləşdirib. Ekspertlər xəbərdarlıq edir ki, uzunmüddətli fasilələr qlobal enerji böhranına və dünya iqtisadiyyatında yeni inflyasiya dalğasına səbəb ola bilər.

Qiymət artımı fonunda dünya fond bazarlarında eniş müşahidə olunub. Avropada DAX, CAC 40 və FTSE 100 indeksləri ciddi şəkildə ucuzlaşıb. Asiyada isə Nikkei 225 indeksi davam edən qeyri-müəyyənlik və münaqişə riskləri səbəbindən 3%-dən çox azalıb.

Bizimyol.info