Bir vaxtlar kitab mağazalarının qarşısında növbə gözləyən insanlar vardı. Əlində yeni romanı olan gəncin gözlərindəki işıq, müəllif imzası üçün saatlarla dayanan oxucuların həyəcanı hələ də çoxlarının yadındadır. Bu gün isə həmin mənzərələrin yerini başqa bir mənzərə tutub: metroda, avtobusda, kafedə insanların əlinə baxanda yalnız telefon görünür.

Oxuma vərdişi itməyib, sadəcə ünvan dəyişib. İndi səhifələr yerini ekranlara verib. Amma sual budur: sosial şəbəkədə sürətlə skrollanan paylaşımlar, statuslar, qısa videolar kitabın verdiyi dərinliyi əvəz edə bilərmi?

Araşdırmalar göstərir ki, Azərbaycanda kitab oxuma faizi xeyli aşağıdır. Ədəbiyyat mağazaları daha çox hədiyyəlik kitabların satışı ilə yaşayır. Gənclərin bir çoxu oxumağa vaxtlarının olmadığını deyirlər, halbuki sosial şəbəkələrdə saatlarla vaxt keçirirlər. Bu, sadəcə maraq məsələsi deyil, həm də mədəniyyət və düşüncə səviyyəsinə təsir edən ciddi problemdir.

Kitab yalnız məlumat mənbəyi deyil, həm də insanın daxili dünyasını formalaşdıran bir güzgüdür. Oxumayan cəmiyyət düşünməyən cəmiyyətə çevrilir. Düşünməyən cəmiyyət isə başqalarının ideyaları ilə asanlıqla idarə olunur.

Telefon işığında ədəbiyyat sönür, amma tam yox olmur. Hələ də kitabsevərlər var, hələ də yazıçılar öz oxucusunu tapır. Sadəcə, daha çox təşviq, daha çox dəstək lazımdır. Məktəblərdə, universitetlərdə oxuma mədəniyyəti aşılanmalı, kitabxanalar cazibədar məkana çevrilməlidir. Ədəbiyyat sosial şəbəkə qədər əlçatan və maraqlı təqdim olunmalıdır. Çünki kitabdan uzaqlaşan nəsil gələcəkdən də uzaqlaşır.

Əsl inkişaf yalnız texnologiya ilə deyil, həm də düşüncə ilə mümkündür. Düşüncə isə səhifələrin arasında gizlidir.

Ədəbiyyat telefon işığında yox olmamalıdır. Əksinə, o işığın özünə çevrilməlidir.

Leyla Mirzə, Bizimyol.info