Xorvatiya 2026-cı ildə Vyanada Avstriyada keçiriləcək "Avroviziya Mahnı Müsabiqəsi"ndə iştirak edəcəyini rəsmən təsdiqləyib.

Bizimyol.info xəbər verir ki, bu barədə Xorvatiyanın ictimai yayım şirkəti HRT (Hrvatska Radiotelevizija) məlumat yayıb.

Məlumata görə, müraciətlərin qəbulu başa çatdıqdan sonra ekspertlərdən ibarət xüsusi komissiya müsabiqəyə təqdim ediləcək əsas mahnını və ehtiyat olaraq dörd digər iştirakçını seçəcək. Xorvatiyada milli seçim mərhələsinin 2026-cı ilin fevral ayında keçirilməsi planlaşdırılır.

Beləliklə, Xorvatiya Fransa, Danimarka, Avstraliya, Malta və Avstriya ilə birlikdə, istənilən şəraitdə "Avroviziya"da iştirak edəcəyini bildirən ölkələr sırasına qoşulmuş olur.

Bu qərar, bir sıra ölkələrin İsrailin müsabiqəyə buraxılması ehtimalına etiraz olaraq "Avroviziya"nı boykot etmək kampaniyasına başladığı bir vaxtda verilib. Daha əvvəl İspaniya, Niderland, Sloveniya, İslandiya, İrlandiya və Belçika, əgər İsrail iştirak etsə, müsabiqədən imtina edəcəklərini bəyan etmişdilər.

"Avroviziya Mahnı Müsabiqəsi" təkcə musiqi yarışı deyil, həm də Avropada və iştirakçı ölkələrdə ictimai və siyasi münasibətlərin əksi kimi özünü göstərir. 2024 və 2025-ci illərdə İsrailin Qəzza zolağında həyata keçirdiyi hərbi əməliyyatlara görə beynəlxalq ictimaiyyətin tənqidi artmış, bir çox ölkələr bu məsələyə görə mədəni tədbirlərdə boykot çağırışları etmişdi.

"Avroviziya"nın təşkilatçısı olan Avropa Yayım İttifaqı (EBU) isə bu cür siyasi boykotların müsabiqənin qeyri-siyasi xarakterinə zidd olduğunu bildirib. EBU-nun mövqeyinə görə, müsabiqədə iştirak edən ölkələrin seçimində əsas kriteriyalar siyasi deyil, yayımçıların EBU üzvü olub-olmamasıdır.

Qadir, Bizimyol.info