İsrailin keçmiş hökumət müşaviri Ariel Bulşteyn ABŞ-ın yəhudi dövlətinin yeganə dostu olması fikri ilə razılaşmayıb.

Bizimyol.info xəbər verir ki, beynəlxalq münasibətlər üzrə analitik Ariel Bulşteyn bildirib ki, İsrailin dünyanın müxtəlif bölgələrində çoxsaylı tərəfdaşları var. Onun sözlərinə görə, Avropa, Asiya və Cənubi Amerikanın bir sıra ölkələri Qüdslə əlaqələri inkişaf etdirməyə çalışır, lakin bunu hər zaman açıq şəkildə nümayiş etdirmir.

Bulşteyn ABŞ vitse-prezidenti Ceyms Devid Vensin Vaşinqtonu İsrailin “yeganə dostu” adlandırmasına münasibət bildirərkən qeyd edib ki, siyasi bəyanatlarla real beynəlxalq münasibətlər arasında fərq var.

Ekspertin fikrincə, Donald Tramp administrasiyasının sərt ritorikası ABŞ-ın rolunu ön plana çıxarsa da, bu, digər ölkələrin İsraillə əməkdaşlıq marağını azaltmır. O bildirib ki, bir çox dövlət İsrailin texnologiya, təhlükəsizlik və iqtisadiyyat sahəsindəki nailiyyətlərini yüksək qiymətləndirir.

Bulşteyn əlavə edib ki, Baş nazir Binyamin Netanyahu da müxtəlif çıxışlarında İsrailin geniş müttəfiqlər dairəsinə malik olduğunu vurğulayıb. Onun sözlərinə görə, Hindistan bu tərəfdaşlardan yalnız biridir.

Analitik hesab edir ki, ölkələrin İsraillə yaxınlaşmaq istəyi həm strateji maraqlarla, həm də İsrailin inkişaf modelinə olan maraqla bağlıdır. Bəzi dövlətlər daxili və xarici siyasi səbəblərə görə bu münasibətləri açıq şəkildə nümayiş etdirməsələr də, əməkdaşlıq davam edir.

Bulşteynin sözlərinə görə, İsraillə dünyanın müxtəlif paytaxtları arasında əlaqələrin dərinləşməsi tendensiyası müşahidə olunur. Bu əməkdaşlıq texnologiya, müdafiə və iqtisadiyyat sahələrində mühüm nəticələr verir.

Ekspert vurğulayıb ki, İsrailin beynəlxalq aləmdə təcrid olunduğu barədə fikirlər reallığı tam əks etdirmir. Onun fikrincə, ölkənin qlobal təsiri təkcə ABŞ-la strateji tərəfdaşlıqdan deyil, həm də geniş diplomatik əlaqələr şəbəkəsindən qaynaqlanır.

Bizimyol.info