Ukrayna Silahlı Qüvvələri 27 iyun gecəsi "MiQ-29" qırıcısı ilə əlaqəni itirib.
Bizimyol.info xəbər verir ki, bu barədə Ukrayna Hərbi Hava Qüvvələri məlumat yayıb.
Bildirilir ki, pilot Poltava vilayəti üzərində döyüş tapşırığını yerinə yetirirdi. Hazırda təyyarənin qəzaya uğramasının səbəbləri və şəraiti araşdırılır.
Hərbi Hava Qüvvələri həmçinin təsdiqləyib ki, təyyarə itirilsə də pilot katapult edə bilib. O, axtarış-xilasetmə qrupu ilə əlaqə quraraq tez bir zamanda tibb müəssisəsinə çatdırılıb və müayinə olunub.
"MiQ-29" — sovet istehsalı olan, dördüncü nəsil çoxməqsədli qırıcı təyyarədir və Ukrayna Silahlı Qüvvələrinin arsenalında mövcuddur. Bu təyyarələr əsasən Rusiya tərəfindən həyata keçirilən kütləvi hava hücumlarının qarşısının alınması, quru hədəflərə zərbələr və cəbhə xəttində patrul uçuşları üçün istifadə olunur.
Xatırladaq ki, iyunun ortalarında Xmelnytski vilayəti üzərində başqa bir Ukrayna hərbi təyyarəsinin — "Su-24"ün qəzaya uğraması qeydə alınmışdı. Həmin hadisədə ekipajın həlak olduğu bildirilmişdi.
Bildirilir ki, Ukrayna hazırda hava qüvvələrini Qərb istehsalı olan təyyarələrlə gücləndirməyə çalışır. Prezident Vladimir Zelenski əvvəllər İsveçdən böyük sayda “Gripen” qırıcılarının alınması planlarından danışmışdı.
Eyni zamanda aviasiya eksperti Konstantin Krivolapın sözlərinə görə, Ukraynada pilot çatışmazlığı yaranıb. Onun fikrincə, sülh dövründə bir təyyarəyə təxminən 2,5 pilot düşməli olduğu halda, müharibə şəraitində bu nisbət 1 təyyarəyə 2 pilot səviyyəsində qəbul edilir.
