Bakıda keçirilən World Urban Forum çərçivəsində iştirak edən beynəlxalq ekspert İbrahim Zakaria forumun yüksək təşkilatçılıq səviyyəsini həyatını xüsusi vurğulayıb. O bildirib ki, bu, qatıldığı üçüncü şəhərsalma forumu olsa da, Bakıdakı tədbir fərqli təəssürat yaradıb.

Ekspertin sözlərinə görə, forumda xidmətlərin koordinasiyası, könüllülərin fəaliyyəti və ümumi təşkilati işlər yüksək səviyyədə qurulub:

“Burada təşkilatçılıq səviyyəsi, xidmətlərin könüllülərlə birlikdə koordinasiyası həqiqətən diqqətçəkəndir. Xüsusilə qadın könüllülər hazırlıq prosesində möhtəşəm iş görürlər”.

O, Bakıda insanların qonaqpərvərliyinin də onda xüsusi təəssürat yaratdığını deyib:

“Burada hər məkana daxil olanda özünü sanki ikinci evində hiss edirsən”.

Mütəxəssis qeyd edib ki, Azərbaycana ilk səfəri olsa da, Bakının memarlığı və şəhər mühiti onu heyran edib:

“Mən müxtəlif tipli binaları, memarlıq strukturlarını görüb həqiqətən təsirləndim. Mənim üçün şəhərin keyfiyyəti yalnız binalarla deyil, orada yaşayan insanların həyat keyfiyyəti ilə ölçülür”.

O bildirib ki, şəhərləri insanların məkanlarla qarşılıqlı əlaqəsinə görə qiymətləndirir və Bakıda bu dinamikanın uğurla qurulduğunu düşünür:

“Mən urban məkanı onun aktivliyinə və insanların həmin məkanla necə əlaqə qurduğuna görə dəyərləndirirəm. Bakı bu baxımdan çox uğurludur”.

Ekspert gələcəkdə yenidən Bakıya qayıtmaq istədiyini də əlavə edib:

“Mütləq yenidən gələcəyəm. Amma növbəti dəfə forum üçün deyil, şəhəri rahat şəkildə gəzmək və daha yaxından tanımaq üçün”.

Leyla Mirzə, Bizimyol.info