Fransız hakimiyyəti “Ambassador Cruise Line” şirkətinə məxsus "Ambition" səyahət gəmisində baş verən yoluxucu xəstəlik səbəbindən 1700-dən çox sərnişini karantinə alıb.

Bizimyol.info xəbər verir ki, bu barədə 2026-cı il mayın 13-də AFP məlumat yayıb. Hadisənin qurbanı 90 yaşlı sərnişin olub.

Digər 48 turist və bir heyət üzvü qida sistemi iltihabı ilə bağlı əlamətlər – qusma və ishal – göstərib. Hazırda Fransanın səhiyyə xidmətləri sərnişinləri Bordo limanında sərt karantin rejimi altında izolyasiya edib.

Səyahət gəmisi əsasən Böyük Britaniya və İrlandiya vətəndaşlarından ibarət sərnişinlərlə Şetland adalarından yola çıxıb. İlk yoluxma mayın 11-də Brest limanında qeydə alınıb və planlaşdırılan İspaniya səfəri ləğv edilib.

Operator şirkət bildirib ki, vəfat edən sərnişinin ölümündən əvvəl açıq yoluxucu əlamətlər müşahidə olunmayıb və onun ölüm səbəbi hələ dəqiqləşdirilməyib. İlkin analizlər norovirusu təsdiqləməyib, lakin həkimlər qida zəhərlənməsi ehtimalını da nəzərdən keçirərək əlavə tədqiqat aparırlar.

Fransız hakimiyyəti vurğulayır ki, bu vəziyyət “MV Hondius” gəmisində baş vermiş hantavirus təhlükəsi ilə bağlı deyil. Mütəxəssislər bildirirlər ki, noroviruslar yüksək yoluxucu qabiliyyətə malikdir, bir çox dezinfeksiya üsullarına davamlıdır və yaşlı insanlar üçün xüsusi təhlükə yaradır. Lakin, yoluxuculuq yüksək olsa da, geniş ictimaiyyət üçün risk aşağı qiymətləndirilir.

Qadir, Bizimyol.info