Keir Starmer yaxın 24 saat ərzində siyasi gələcəyini qorumaq üçün ciddi təzyiq altındadır. Onun rəhbərlik etdiyi Leyboristlər Partiyası daxilində mümkün rəqiblər — Ves Streeting və Angela Rayner — artıq liderlik yarışına hazırlaşmağa başlayıblar.

Bizimyol.info xəbər verir ki, Starmer bazar ertəsi çıxış edərək ölkənin iqtisadi inkişafı, enerji, müdafiə və Avropa ilə münasibətlər kimi sahələrdə “böyük çağırışlarla üzləşməyə hazır olduğunu” bəyan etməklə mövqeyini gücləndirməyə çalışır.

Lakin yerli seçkilərdə zəif nəticələrdən sonra vəziyyət onun üçün çətinləşib. Təxminən 40 deputat onun vəzifədən getməsi üçün tarix müəyyən etməsini tələb edib. Bu çağırışların bir hissəsi Andy Burnhamın tərəfdarlarından gəlib.

Seçkilərdə "Reform UK" və "Green Party"na (Yaşıllar Partiyası) səs itkiləri vəziyyəti daha da gərginləşdirib. Streetingin yaxın çevrəsindən bir şəxs bildirib ki, o hələlik birbaşa hücum etməyi planlaşdırmır, amma “Starmerin vəziyyəti pisləşərsə, buna hazır olacaq”.

Angela Rayner isə dəyişiklik çağırışı edərək Starmerin “anı dəyərləndirməli olduğunu” deyib. Onun tərəfdarları Raynerin hələ rəsmi namizəd olmadığını, lakin lazım gələrsə yarışa qoşula biləcəyini bildirirlər.

Hökumət adından çıxış edən Peter Kyle Starmerin vəziyyəti dəyişdirə biləcəyini desə də, bunun üçün daha “cəsarətli siyasi xətt” nümayiş etdirməli olduğunu vurğulayıb.

Partiya daxilində vəziyyət gərgin olaraq qalır. Bəzi deputatlar “stalking horse” adlanan mexanizm vasitəsilə Starmerə qarşı liderlik yarışını tezləşdirməyə çalışırlar.

Hazırkı böhran fonunda bəzi deputatlar Ed Miliband və digər nazirlərin də mümkün namizəd ola biləcəyini istisna etmirlər. Partiya daxilində isə gələcək iqtisadi siyasət və Avropa ilə münasibətlər mövzusu ətrafında ciddi müzakirələr aparılır.

Starmer isə bütün tənqidlərə baxmayaraq, hələlik istefa planlaşdırmadığını və iki müddət vəzifədə qalmaq niyyətində olduğunu bildirir.

Qadir, Bizimyol.info