Avropa İttifaqı (Aİ) ölkələri 2027-ci ilin sonuna qədər Rusiya qazının idxalına qoyulan qadağanı təsdiqləyiblər.

Bizimyol.info xəbər verir ki, qərar Brüsseldə Aİ nazirlərinin görüşündə qəbul edilib.

Macarıstan və Slovakiya əleyhinə səs verib, Bolqarıstan isə bitərəf qalıb. Macarıstan artıq qanundan Avropa Ədalət Məhkəməsinə şikayət etmək niyyətində olduğunu açıqlayıb.

Təsdiqlənmiş qaydalara əsasən, Avropa Birliyi 2026-cı ilin sonuna qədər Rusiyanın mayeləşdirilmiş təbii qazının idxalını, 2027-ci il sentyabrın 30-dək isə boru kəməri qazının idxalını dayandıracaq. Lakin, ayrı-ayrı ölkələr qış mövsümündən əvvəl qaz anbarlarını doldurmaqda çətinlik çəkərsə, son tarix uzadıla bilər, lakin 2027-ci il noyabrın 1-dən gec olmayaraq.

Qanun şirkətlərə Rusiya qazının tədarükü üçün yeni müqavilələr bağlamağı qadağan edir. Mövcud müqavilələr də ləğv edilə bilər. 2025-ci il iyunun 17-dən əvvəl imzalanmış qısamüddətli müqavilələr çərçivəsində idxal 2026-cı il aprelin 25-dən etibarən mayeləşdirilmiş təbii qaz üçün, 2026-cı il iyunun 17-dən isə boru kəməri qazı üçün qadağan ediləcək. Uzunmüddətli müqavilələr müəyyən edilmiş müddətlərə qədər ləğv edilməlidir.

Bu tələblərin pozulması şirkətin ümumi illik dövriyyəsinin 3,5%-dək cərimə ilə nəticələnəcək.

2022-ci ilə qədər Rusiya Aİ-nin qaz tədarükünün 40%-dən çoxunu təşkil edirdi. Son hesablamalara görə, bu pay 2025-ci ilə qədər təxminən 13%-ə düşüb.

Buna baxmayaraq, bir sıra Aİ ölkələri Rusiyadan neft, boru kəməri qazı və mayeləşdirilmiş təbii qaz almağa davam edir. Ötən ay Aİ-nin ən böyük beş idxalçısı Rusiya enerjisinə, əsasən qaz və mayeləşdirilmiş təbii qaza 1,4 milyard avro xərcləyib. Macarıstan ən böyük alıcı olub, ardınca Fransa və Belçika gəlir. Avropa Komissiyası həmçinin yaxın aylarda Rusiya boru kəməri neftinin tədricən dayandırılmasına və Aİ ölkələrinin Rusiyanın nüvə yanacağından asılılığının azaldılmasına yönəlmiş yeni qanunvericilik təklif etməyi planlaşdırır.

Qadir, Bizimyol.info