Uzunmüddətli yol hərəkəti səs-küyünə məruz qalmaq Parkinson xəstəliyinə tutulma riskini artıra bilər. Bu nəticə indiyədək bu mövzuda aparılmış ən genişmiqyaslı araşdırmada ortaya çıxıb.

Bizimyol.info xəbər verir ki, "JAMA Neurology" jurnalında dərc olunan tədqiqat çərçivəsində Danimarkada yaşı 40-dan yuxarı olan 3,1 milyon nəfər 18 il ərzində izlənilib. Alimlər müəyyən ediblər ki, yaşayış yerində səs-küy səviyyəsinin hər 11,5 desibel artması Parkinson xəstəliyi riskini 3 faiz yüksəldir.

Araşdırmaya görə, evin daha sakit hissəsinin olması səs-küyün mənfi təsirini müəyyən qədər azalda bilər.

Mütəxəssislər hesab edirlər ki, davamlı səs-küy yuxunun pozulmasına və stress hormonunun – kortizolun səviyyəsinin artmasına səbəb olur ki, bu da Parkinson xəstəliyinin inkişafı ilə əlaqəli ola bilər.

Bununla belə, tədqiqat müəllifləri vurğulayırlar ki, əldə olunan nəticələr səs-küyün Parkinson xəstəliyinə birbaşa səbəb olduğunu sübut etmir, yalnız bu amillər arasında əlaqənin mövcudluğunu göstərir.

Ekspertlər bildirirlər ki, yol hərəkətindən yaranan səs-küyün sağlamlığa təsiri ilə bağlı araşdırmaların artması hökumətlərin və yerli idarəetmə orqanlarının xüsusilə əsas magistrallarda səs-küyün azaldılması istiqamətində daha ciddi tədbirlər görməsini zəruri edir.

Bizimyol.info