Çex hökuməti ibtidai və orta məktəblərdə mobil telefon, ağıllı saat və digər elektron rabitə cihazlarından istifadənin qadağan edilməsini nəzərdə tutan qanun layihəsini təsdiqləyib.

Bizimyol.info xəbər verir ki, ölkə mətbuatının məlumatına görə, Nazirlər Kabinetində yekdilliklə qəbul edilən layihə parlament tərəfindən də təsdiqlənərsə, 1 sentyabr 2027-ci ildən qüvvəyə minəcək.

Qadağa uşaq bağçaları, ibtidai məktəblər, orta məktəblər və orta təhsilin aşağı pillələrində tətbiq olunacaq. Məhdudiyyət yalnız dərs zamanı deyil, həmçinin tənəffüslərdə, məktəb yeməkxanalarında, dərsdənkənar hazırlıq mərkəzlərində və klublarda da qüvvədə olacaq.

Çex hökuməti bildirib ki, bu addım şagirdlərin diqqətini artırmaq, akademik nəticələri yaxşılaşdırmaq və məktəb mühitini daha sağlam hala gətirmək məqsədi daşıyır. Rəsmi şəxslər bu sahədə Fransa və Niderland kimi ölkələrin təcrübəsinə istinad ediblər.

Bununla belə, ölkədəki bəzi müxalifət partiyaları təşəbbüsə qarşı çıxıb. Onlar hesab edirlər ki, belə bir qadağa uşaqların rəqəmsal bacarıqlarının inkişafına mənfi təsir göstərə bilər.

Qanun layihəsi parlamentdə təsdiqlənəcəyi təqdirdə, Çex Respublikası nəzərdə tutulan məktəblərdə elektron cihazlardan istifadəyə genişmiqyaslı məhdudiyyət tətbiq edən Avropa ölkələrindən birinə çevriləcək.

Bizimyol.info