Uşaq təhlükəsizliyi üzrə mütəxəssislər dünyada "onlayn zorakı istismar" hallarının sürətlə artdığı barədə xəbərdarlıq edirlər. Cinayətkarlar sosial şəbəkələr və onlayn oyunlar vasitəsilə həssas uşaqları hədəfə alaraq onları cinsi xarakterli görüntülər hazırlamağa, özlərinə və başqalarına zərər verməyə məcbur edirlər.

Bizimyol.info xəbər verir ki, ABŞ-ın İtkin və İstismar Edilən Uşaqlar üzrə Milli Mərkəzinin (NCMEC) məlumatına görə, 2025-ci ildə bu cür hallarla bağlı 3 mindən çox müraciət qeydə alınıb. Bu, əvvəlki illə müqayisədə 125 faiz çoxdur.

Mütəxəssislərin sözlərinə görə, cinayətkarlar əsasən "Roblox" və "Minecraft" kimi oyunlarda, eləcə də psixoloji problemlərlə bağlı sosial media qruplarında həssas uşaqları müəyyənləşdirirlər. Daha sonra onları Telegram kimi mesajlaşma platformalarına yönləndirərək şantaj və psixoloji təzyiqə məruz qoyurlar.

ABŞ Federal Təhqiqat Bürosu (FTB) bu il valideynlərə xəbərdarlıq edərək, xüsusilə "764" kimi zorakı onlayn şəbəkələrin uşaqları istismar etmək məqsədilə fəaliyyətini gücləndirdiyini bildirib.

Mütəxəssislər qeyd edirlər ki, qurbanlar özlərinə xəsarət yetirməyə, ailə üzvlərinə və ev heyvanlarına zərər verməyə, hətta intihara cəhd etməyə qədər müxtəlif ağır hərəkətlərə məcbur edilə bilirlər.

Onların fikrincə, valideynlər uşaqların internetdəki fəaliyyətinə daha diqqətlə nəzarət etməli, şübhəli ünsiyyət və davranışlara qarşı ayıq olmalıdırlar.

Bizimyol.info